Millimizin baş məşqçisi Fernando Santuş publikaya təqdim olunduğu gün yetərincə xoşbəxt görünür, inamlı açıqlamalar verirdi.

Ölkəmizin futbol infrastrukturu və yerli futbolçu bazası ilə tam tanışlıqdan sonra həmin əhval-ruhiyəni qoruyub-qorumadığı isə şübhə altındadı. İlkin mərhələdə stadionların durumuyla bağlı narazılıqlarıyla gündəmə gələn mütəxəssisin bir neçə gün sonra oyuunçular haqda giley-güzarını eşidə bilərik. İndi onun qara-qara düşündüyü bəllidi. Ona görə ki, yığma sentyabrın 5-də Millətlər Liqası çərçivəsində İsveçlə qarşılaşacaq. “Tofiq Bəhramov”da keçiriləcək oyunda ölkəmizi hansı futbolçuların təmsil edəcəyi hələ bilinmir. Görünür, Santuş seçimlər zaman böyük çətinliklə üzləşib. Təəssüf ki, səbəb bolluq yox, qıtlıqdı.

Şahruddin Məhəmmədəliyev və Mahir Emreli zədəlidi. Kapitan Emin Mahmudov “Neftçi”də sarğını itirib, Qriqorçuk ona start heyətində güvənmir. Legionerlərin əksəriyyəti doğma premyer-liqaya qayıtdı. Aparıcı komandalarımız avrokuboklarda yaxşı nəticələr əldə edə bilmədi. Samir Abasovun dediyinə görə, “Sumqayıt”ın futbolçuları hələ də yorğundu. “Neftçi” bərbad oyun tərziylə azarkeşlərini təngə gətiribsə, “Kəpəz” hələ qələbəyə həsrətdi. “Zirə”ni Nikosiyada darmadağın etdilər. “Araz-Naxçıvan”, “Səbail”, “Şamaxı” və qismən “Turan Tovuz” yenidən qurulub. İndi həmin kollektivlərdə xətlərarası əlaqə, uyğunlaşma, konkret oyun strategiyası kimi meyarlar minimal səviyyədədi. Qaldı “Qarabağ” ki, futbolçuların iki cəbhədə mübarizə aparması, avrokuboklardakı rəqiblərin ciddiliyi çətinliyi son həddə gətirib. Belədə Santuşun hələ də millinin heyətini toparlaya bilməməsi anlaşılandı. İndi o, ideal yox, sadəcə, “pislər arasında ən yaxşılardan” ibarət komanda qurmalıdı. İsveçin qarşısına çıxarıla biləcək mümkün “11-lik” isə yəqin ki, belə olacaq: Yusif İmanov, Qismət Alıyev, Bəhlul Mustafazadə, Şəhriyar Əliyev, Emin Mahmudov, Coşqun Diniyev, Elvin Camalov, Elvin Cəfərquliyev, Toral Bayramov, Renat Dadaşov, Ramil Şeydayev.

İndi siz deyin, millimizdən İsveçlə matçda uğur gözləməyə dəyərmi? Ya da sualı belə qoyaq: çarəsiz Santuş neynəsin?

KƏNAN BAHADIR