“Yenə də fikrimin üstündə qalıram. Oyundan əvvəl də düşünürdüm ki, “Qarabağ” dominant olacaq, yüzfaizlik qol vəziyyətləri yaradacaq. Belə də oldu. Lakin bu qədər qol imkanlarını boşa verəcəklərini təxmin etmirdim. “Qarabağ”ın üstün tərəfləri nə idisə, onu da meydana qoymağa çalışdılar, təhlükəli vəziyyətlər yaratdılar. Ümumilikdə oyunu iki hissəyə bölərdim: 65-70 dəqiqəlik hissə, daha sonra 20-25 dəqiqəlik sonluq. İki fərqli “Qarabağ” gördük. Komanda ilk 60-70 dəqiqə ərzində cəmi bir qol buraxdı. Onu da qapıçının inamsızlığı üzündən. Bir də rəqibin tirdən dönən topu var idi. “Qarabağ” isə əvəzində 4-5 qol imkanından yararlana bilmədi. İkinci hissədə də üstünlük biz tərəfdəydi, yaxşı başlamışdıq. Düşünməzdim ki, bu qədər qol vəziyyəti yaradacaq, amma vura bilməyəcəyik. Desəm ki, futbolçuların ustalıq səviyyəsi aşağıdı, bir az gülünc çıxar. Desəm ki, futbolçular təzyiq altındaydı, o da gülünc çıxar. Çünki “Braqa” və “Bayer-04” ilə görüşlərdə ələ düşən kiçik qol epizodlarını da qola çevirən komandadı. Nəinki üç, hətta beş qol da buraxa bilərdik. Dirəkdən dönən top, penalti məsələsi. Oyunun son dəqiqələrində isə “Qarabağ” heç özünə oxşamırdı. Daha bilmirəm ki, bu fiziki, yoxsa mental yorğunluqla bağlı idi. Çünki 2-ci qoldan sonra rəqibin əks-hücumlarını buraxdıq. Bir də zaqreblilər son dəqiqələrdə hiylə işlətdi. Onlar müdafiədə olduqları halda heç vaxt 2-3 oyunçusunu geri çəkmirdi. Oyunda bir qədər buna diqqət etmək lazım idi. Əslində bəxt üzümüzə güldü. Topun Elvin Cəfərquliyevin əlinə dəydiyi epizodda penalti vermədilər, son saniyələrdə vurduqları top dirəkdən döndü. Cavab oyununa gəlincə, düşünürəm ki, yenə də üstün tərəf biz olacağıq. Hətta ilk yarıda minimum 2 qol vurmaq şansımız var. Ancaq yenə də bu qolların vurulmasına görə tərəddüd edirəm. Hava şəraiti də rəqibi çətinə sala bilər. İndi bir çətinliyimiz də var: 3 qol vuracağımız halda, qapımızı da toxunulmaz saxlamalıyıq. Bunun üçün isə rəqibin əks-hücumlarına hazır olmaq lazımdı. Əminəm ki, “Dinamo” burdakı oyunda “müdafiəyə oturaraq”, hesabı qorumağa çalışacaq. İmkan düşəndə irəli çıxacaqlar. Həmçinin yenə irəlidə ən azı 2-3 oyunçu saxlayacaqlarını düşünürəm. Nəticəyə baxmayaraq, yenə də ümidlərim ölməyib. Doğrudu, 3 top buraxmaqla işimizi çətinləşdirdik. Lakin ilk hissədə bir qol vurarıqsa, əminəm ki, mərhələni də keçərik”.

“Əvəzetmələrə gəlincə, məsələn, elə İsayev ötən tsikldə Avropa Liqasının oyunlarında həddən artıq aşağı səviyyədə çıxış edib. Hesab edirəm ki, belə futbolçular, sadəcə, ölkə çempionatı üçün alınıb. Sözsüz, komandanın texniki heyəti də dəyişiklikləri düşünüb. Bəzən elə olur ki, sonradan meydana çıxan futbolçu qol vurur. Onda da yazırlar ki, məşqçi dəhşətli dərəcədə oyunu hiss etdi, belə dəyişiklik etdi-filan… Bunlar təsadüflərdən başqa bir şey deyil. Yəni oyunu gücləndirmək üçün dəyişikliklər lazımdı. Ancaq sonradan çıxanların hansı səviyyədə olması sual doğurur. Hətta Leandro Andradenin dəyişilməsi belə maraqlıdı. Ola bilsin, yorğunluq fonunda dəyişildi. Lakin Andrade əvəzlənəndən sonra hücumların kəsəri aşağı düşdü”.