Zaqreb “Dinamo”su ÇL-in pley-off mərhələsindəki ilk oyununda “Qarabağ”ı darmadağın etdi – 3:0.

“Football-plus.az”ın məlumatına görə, Xorvatiya təmsilçisinin hücumçusu Sandro Kulenoviç matçdan sonra jurnalistlərin suallarını cavablayıb. Onun oyun haqda fikirləri:

- Qarşıya qoyulan məqsədə nail olduq. Çox yaxşı oynadıq və şanslar yaratdıq. “Qarabağ” da çox güclü komanda olduğunu, irəlidə yaxşı oynaya bildiyini göstərdi. Lakin fürsətləri əldən verdilər. Bakıya üstün yollanacağıq. Hələ böyük iş gördüyümüzü deyə bilmərəm.

- İki qolla qələbədə böyük pay sahibi olduz...
- Komandama kömək edə bildiyim üçün şadam.

- Bilet qiymətləri çox baha idi. Buna baxmayaraq, 14 mindən çox azarkeş sizi dəstəkləməyə gəlmişdi.
- Bəli, son 7-8 ayda azarkeşlərimizin sayı xeyli artıb. İstənilən hava şəraitində yanımıza gəlirlər. Uduzanda belə alqışlarıyla yenidən ruhlandırırlar. Onlar tərifə layiqdi.

- “Qarabağ”ı böyük hesabla məğlub edəcəyinizi düşünürdüz?
- Rəqibi yaxşı təhlil etmişdik. Baş məşqçimiz azərbaycanlıların çox təhlükəli komanda olduğundan və hücum xəttində əla futbolçularının varlığından bəhs etmişdi. Əlbəttə, 90 dəqiqə ərzində dominant ola bilməzdik. “Qarabağ” da çoxlu hücum qurdu. Lakin dediyim kimi, bunlardan istifadə edə bilmədi. Biz isə hər fürsətə ciddi yanaşdıq. Təbii ki, daha çox qol vura bilərdik. Amma 3:0 da yaxşı nəticədi.

- “Qarabağ”ı mübarizədən kənarlaşdıracağınıza inanırsız?
- Hələ heç nə bitməyib. Səfərdə də müsbət nəticə əldə etməliyik. Rəqibin öz evində daha yaxşı oynayacağını bilirik.

KƏNAN BAHADIR