“Dinamo”nu Bakıda asan qarşılaşma gözləyir” – Ozobiç xorvatlara hər şeydən danışdı
“Qarabağ” sabah Çempionlar Liqasının pley-off mərhələsi çərçivəsində Zaqreb “Dinamo”su ilə cavab matçına çıxacaq.
Xorvatiyada 0:3 uduzan “köhlən atlar”ın mərhələ adlaması asan görünmür. “Neftçi”nin oyunçusu Filip Ozobiç bu oyunla bağlı Xorvatiya mətbuatına müsahibə verib. Təcrübəli yarımmüdafiəçi 5 mövsüm formasını geydiyi Ağdam təmsilçisinin şansının az olduğunu bildirib:
“Çox maraqlı ola bilər, amma 3:0 böyük üstünlükdü və "Dinamo"nun bundan imtina edəcəyinə inanmıram”.
“Qəbələ” ilə müqavilə bağladığı 2016-cı ildən Azərbaycanda yaşayan və “milliləşdirilən” Ozobiç ölkədəki hava şəraitiylə bağlı da Xorvatiya mediasını məlumatlandırıb: “İlin bu vaxtında temperatur və rütubət xüsusilə yüksəkdi. Kibriti bir yana qoyaq, açıq kafedə oturanda belə tər tökəcəksiz...
“Dinamo"dan heç kim mənə zəng etmədi, məncə, onlar burdakı iqlim şəraiti haqqında hər şeyi bilirdilər və Fran Tudor onlara xəbərdarlıq etdi. Xüsusilə axşam saatlarında rütubət yüksək olur. Bakının Xəzər dənizinin kənarında olmasının buna çox təsiri var. Gələndə belə iqlim şəraitinə öyrəşməyim bir qədər çəkdi. Amma mən kokos suyu içmədim, sadəcə, adi su və onların klubda mənə verdiyi elektrolitləri Zaqrebdə oynayanda içdiyimdən daha çox içdim. Belə ab-hava yorucudu, “Dinamo”nun bəzi oyunçuları ikinci hissədə problem yaşaya bilər. Çünki bütün oyunu keçirmək çətindi. Rütubət sizi yorur”.
Filip xorvatiyalı jurnalistin “ilk matç hər iki komandanın gücü baxımından nə göstərdi?” sualını belə cavablayıb:
“Sonda “Dinamo” dördüncü və beşinci qolları vurmağı bacarardı. Amma hesab 3:0 olsa da, asan qələbə olmadı. “Qarabağ”ın çox yaxşı epizodları var idi, lakin qol vura bilmədilər... “Qarabağ” ən azı bir saat keyfiyyətli futbol oynadı. Onların cinahları arada boşluğa gedir və orda çoxlu problem yaşayırlar. Bununla belə, “Dinamo”nun hər hansı zəif tərəflərinin olduğunu deyə bilmərəm”.
“Onların düşüncə tərzini biləcək qədər “Qarabağ”da olmusan. Vəziyyəti dəyişə biləcəklərinə inanırlar, yoxsa buna şübhə edirlər?” sualına isə 33 yaşlı yarımmüdafiəçinin reaksiyası belə olub:
“Heç kimdən soruşmamışam, amma əminəm ki, ilk dəqiqədən etibarən bacardıqca hücuma atılacaqlar, tezliklə qol vurmaq istəyəcəklər. Şans qazanacaqlarına ümid edirlər. “Dinamo” fərqindədi ki, onları burada asan qarşılaşma gözləyir”.
- Azarkeşlərin əhval-ruhiyyəsi necədi? Onların səbri varmı?
- Burda fit çalmaq olmaz. “Qarabağ” sürətli qol vurmasa, azarkeşlər şikayət etməyəcək. Onlar matçboyu alqışlanacaqlar və stadion dolu olacaq. Atmosfer isti olacaq, lakin Xorvatiyada azarkeşlər daha mütəşəkkildi. Yenə də burda alovludular. Oynamaq gözəl olacaq.
- “Dinamo” bir az daha qapanıb üstünlüyü qorumalı, yoxsa ilk oyundakı kimi oynamalıdı?
- “Dinamo” müdafiə olunaraq hesabı saxlayacaq komanda deyil. Onun keyfiyyətli oyunçuları var, bu mənada oyun tərzini dəyişəcəyini düşünmürəm. Başqa bir cəhət də odu ki, baş məşqçi komandanın sxemini dəyişə biləcəyini göstərdi. Sergey Yakiroviç bilir ki, hansı oyunçular ona nə gətirə bilər, hansı variant daha yaxşıdı, amma 3-5-2-dən istifadə etsə belə, bu müdafiə sxemi deyil. Düşünürəm ki, məşqçi Qurban Qurbanov heç nəyi dəyişməyəcək, hər şey Zaqrebdəki kimi olacaq. Onun öz üslubu var və ona toxunmur.
- “Qarabağ”ın ən yaxşı futbolçuları kimlərdi?
- Monteneqrolu Veşoviçlə Yankoviçi zədəyə görə qaçırdılar. Onlar hücumda güclüdü, Juninyo “Dinamo” üçün ən böyük təhlükədi.
- Veşoviç və ya Yankoviç sağalacaq?
- Sağalacaqlarını bilmirəm, amma oynayacaqlarını düşünmürəm.
- Qurban Qurbanov kimdi? O, 2008-ci ildən "Qarabağ"a rəhbərlik edir…
- Nəticələr öz sözünü deyir. Adam böyük işlər görüb. Klubda onu yüksək qiymətləndirirlər. Öz futbol üslubunu inkişaf etdirir. Pep Qvardiola belə oynayır. Onlar topa sahib olmaq üçün çalışırlar, topu mümkün qədər ayaqlarında saxlamaq və ona görə də təhlükəli olmaq istəyirlər.
- Təlimlər necə görünür? Oyunun taktiki detalları üzərində nə qədər iş aparılır? Çünki Xorvatiyada heç bir komanda “Qarabağ” qədər inteqrasiya olunmayıb…
- Bütün məşqlər topla keçirilir, topsuz qaçışlar çox olmur, mövqe hücumları çox olur. O, kimin hara gedəcəyini və hər bir oyunçunun nə etməli olduğunu dəqiq bilməkdə israrlıdı. Böyük təhsili var. Komandanın uzun müddətdi bir yerdə olması harmoniyaya töhfə verir, hər mövsüm iki-üç oyunçu dəyişir. Xorvatiya çempionatında isə daha çox dalğalanmalar olduğu üçün oyun yaratmaq daha çətindi. Məşqdə kimin hara hərəkət edəcəyi ilə bağlı çox iş görülür. Məsələn, mərkəz müdafiəçisi yarımmüdafiəçi oynayır, işi kimə buraxır, sonra hara gedirik, yoxsa müdafiəçi arxaya qaçır... Hücum zamanı kimin nə etməli olduğu dəqiq müəyyən edilir…
- Matçın axarını və nəticəsini necə gözləyirsiz?
- Mütləq yaxşı matç olacaq, çoxlu qol vəziyyəti gözləyirəm, amma 3:0 böyük üstünlükdü. Bu, bir-iki top fərqi deyil, üç qol həddən artıqdı. Xüsusən də hazırda “Dinamo”nun heyətində Petkoviç, Baturina, Kulenoviç kimi təhlükəli hücumçular var. Bu əla nəticədi və "mavilər" Çempionlar Liqasının qrupuna düşməlidi.
- Azərbaycana azarkeşlər gəlir, onları Bakıda nə gözləyir?
- Bura gələnin heç bir problemi olmayacaq, hamı özünü çox yaxşı hiss edəcək. Çölə çıxmaq istəyənlər üçün çoxlu gözəl restoranlar, klublar, kafelər var.
- Hazırda dabanındakı ağrı səbəbindən oynamırsan. Lakin Azərbaycan millisindən imtina etmədin. Millətlər Liqasının və dünya çempionatının seçmə mərhələsində çıxış etməyi planlaşdırırsan?
- Sağlam və formada olsam, daha çox oynamaq istərdim.
KAMAL SƏFƏR
Digər xəbərlər
