Argentina çempionatında keçirilən 10-cu turun oyunlarından sonra liderlər qrupunda vəziyyət qismən dəyişdi. “Atletiko Urakan” liderliyi, “Union” isə 2-ci yerdəki mövqeyini qorudu.

Turun mərkəzi oyunu məhz liderin iştirakı ilə keçdi. Çətin səfərə çıxan “Atletiko Urakan” “River Pleyt”in qonağı oldu. Ev sahiblərinin hazırda çətin günlərini yaşadığı hamıya bəllidi. Mövsümə zəif başlayan “River”də baş məşqçi dəyişikliyinin zərurətə çevrildiyini xəbər vermişdik. Argentinanın son çempionu 3-7-ci turlarında keçirdiyi 5 oyundan 3-də məğlub olduğu üçün Martin Demiçelisin postundan ayrılması qaçılmaz olmuşdu. “Milyonçular”ı “Union” ilə qolsuz nəticələnən matça Marselo Eskudero çıxarsa da, onun fəaliyyətinin müvəqqəti xarakterli olduğu məlum idi. Maraqlıdı ki, rəhbərlik baş məşqçi vəzifəsinə, belə desək, doğma mütəxəssisi təyin edib: bəli, komandanın sabiq yarımmüdafiəçisi, “River”ə 2014-22-ci illərdə başçılıq edən və çox sayda titul qazandıran Marselo Qalyardo yenidən “Monumental”dadı!

Ötən mövsüm “Əl-İttihad”ı (Səudiyyə Ərəbistanı) çalışdıran 48 yaşlı mütəxəssisin bəxtsizliyindən köhnə-yeni komandası 10-cu turda çempionatın lideri ilə qarşılaşdı. “Atletiko Urakan” ilə matçın əvvəli ev sahiblərinin üstünlüyü şəraitində keçdi və “River” 13-cü dəqiqədə Eçeverrinin qolu ilə hesabı açdı. Son çempion bundan sonra da oyun planında azacıq üstünlüyə malik oldu. Lakin ara-sıra hücumlara atılan qonaq komanda fasilə ərəfəsində Eçeverriya ilə cavab qolunu vurdu. İkinci hissədə topa daha çox sahib olan Qalyardonun komandası qapıya dəqiq zərbə endirməkdə çətinlik çəkdi. Bunun əsas səbəbi isə rəqibin arxa xəttinin inamlı oyunu ilə bağlı idi. Beləliklə, məğlubiyyətsiz seriyasını davam etdirən Frank Kudelkanın komandası bir xal qazanmaqla liderliyini qorudu. “River Pleyt” isə 11-ci yerdən 9-a yüksəldi.

“Atletiko Urakan”ın bəxtindən tura 2-ci yerdə başlayan və liderdən bir xal geridə olan “Union” da büdrədi. “Belqrano” ilə səfər oyununun ilk hissəsi qolsuz sona çatdı. Fasilədən dərhal sonra hesabı açan qonaqlar qələbəyə çox yaxın idilər. Lakin son saniyələrdə buraxılan qol “Union”un ardıcıl ikinci matçda iki xal itirməsini qaçılmaz etdi. Kristian Qonsalesin komandası liderdən yenə bir xal geridədi.

Tura hərəyə 17 xal toplamaqla 3-4-cü yerlərdə başlayan komandalar fərqli nəticələr göstərdilər. “Rasinq” evdə gözlənilmədən “Ximnasiya”ya minimal hesabla uduzdu. Uğursuz nəticə avelyanedalıları 3-cü yerdən 6-ya saldı. “Veles Sarsfild” isə hesabına yalnız bir xal yaza bildi. Qustavo Kinterosun komandası çempionatın əvvəlki 4 matçında maksimum nəticə göstərmişdi. Qələbə seriyası “Banfild” ilə səfər oyununda qırıldı. 2:2 hesablı “sülh”ə razılaşan “Veles” 4-cü yerdəki mövqeyini itirmədi. “Platense”ni evdə iki cavabsız qolla üstələyən “İnstituto”nun da hesabında 18 xal var.

Ölkənin digər nəhənginin vəziyyəti də ürəkaçan deyil. Səfərdə “İndependyente Rivadaviya”dan bir xalı (1:1) final fitindən əvvəl vurulan qolla alan “Boka Xuniors” son 5 oyunda 4-cü dəfə heç-heçə oynadı. Dieqo Martinesin komandası 13-cü yerdən 15-ə gerilədi.

9-cu turun oyunları
Deportivo Riestra – Sentral Kordoba 1:0
X.Errera, 39.
Ximnasiya – Rosario Sentral 0:1
OKonnor, 71.
Platense – Banfild 0:1
Sepulveda, 10.

10-cu tur
River Pleyt - Atletiko Urakan 1:1
Eçeverri, 13 – Eçeverriya, 37.
Belqrano - Union 1:1
M.Suares, 90+4 – Balboa, 46.
Rasinq - Ximnasiya 0:1
B.Dominges, 13.
Banfild - Veles Sarsfild 2:2
Sepulveda, 62; 75 – Pitsini, 16. Akino, 57.
Barrakas Sentral - Talyeres de Kordoba 1:1
Kandia, 76 – Qalarsa, 84.
İndependyente Rivadaviya – Boka Xuniors 1:1
Vilyalba, 77 – Medina, 90+5.
Arxentinos Xuniors - Sarmyento 0:0
Deportivo Riestra – Lanus 3:1
Alonso, 49. A.Dias, 77. X.Errera, 90+5 – X.Torres, 80.
San Lorenso - Atletiko Tukuman 0:1
Tesuri, 90+5.
Rosario Sentral - Nyuellz Old Boyz 1:0
Malyo, 83.
Sentral Kordoba - Defensa y Xustisiya 2:0
Barrios, 23. Qodoy, 55.
İnstituto - Platense 2:0
Alarkon, 82-p. F.Suares, 89.
Estudiantes - İndependyente 0:2
Lomonako, 34. Avalos, 62.
Tiqre - Qodoy Krus 0:2
Altamira, 36.S.Rodriges, 74.

1. Atletiko Urakan 10 5 5 0 11-4 20
2. Union 10 5 4 1 10-5 19
3. Atletiko Tukuman 10 5 4 1 11-7 19
4. Veles Sarsfild 10 5 3 2 16-8 18
5. İnstituto 10 5 3 2 13-7 18
6. Rasinq 10 5 2 3 17-9 17
7. Talyeres de Kordoba 10 4 5 1 15-11 17
8. Belqrano 10 4 4 2 14-14 16
9. River Pleyt 10 4 3 3 14-9 15
10. Estudiantes 10 4 3 3 13-9 15
11. Rosario Sentral 10 4 3 3 13-10 15
12. İndependyente Rivadaviya 10 4 3 3 7-5 15
13. Deportivo Riestra 10 5 0 5 11-10 15
14. Lanus 10 4 3 3 15-16 15
15. Boka Xuniors 10 3 5 2 12-8 14
16. Ximnasiya 10 4 1 5 12-12 13
17. Arxentinos Xuniors 10 4 1 5 8-12 13
18. Sarmyento 10 3 3 4 8-9 12
19. İndependyente 10 2 5 3 7-9 11
20. Platense 10 3 2 5 8-11 11
21. Nyuellz Old Boyz 10 3 2 5 6-11 11
22. Banfild 10 2 4 4 9-14 10
23. Qodoy Krus (-3) 9 3 3 3 7-8 9
24. Tiqre 10 2 3 5 10-17 9
25. San Lorenso 9 1 4 4 5-8 7
26. Barrakas Sentral 10 1 4 5 5-12 7
27. Defensa y Xustisiya 10 0 5 5 7-17 5
28. Sentral Kordoba 10 1 1 8 9-21 4

Bombardirlər: Akino (Veles Sarsfild), Borxa (River Pleyt) - 6, Bartissiotto (Talyeres de Kordoba), M.Ximenes (Boka Xuniors), Pussetto (Atletiko Urakan), S.Rodriges (İnstituto), Xara (Belqrano) - 5.