“Osiyek” ermənini Bakıya gətirmək istəmirdisə, niyə səfirliyə müraciət edib? - Açıqlama
Son günlər müzakirə mövzusuna çevrilən “Osiyek”in erməni futbolçusu Styopa Mkrtçyanın Bakıya gəlməyəcəyi dəqiqləşdi. Konfrans Liqasinin cavab oyunu üçün “Osiyek”in aparıcı oyunçularından sayılan erməninin də gəlməsi gözlənilirdi.
Bu barədə “Zirə”dən bizə verilən açıqlamada “Osiyek”in bir müddət əvvəl Azərbaycanın Xorvatiyadakı səfirliyinə rəsmi müraciət etdiyi və icazə verilərsə, gələcəyi deyilmişdi. Lakin bu gün ermənu idman jurnalisti Suren Meliksetyan fərqli məlumat yayıb:
“Osiyek” futbolçusunu Bakıya aparmamaq qərarı verib. Qərar Xorvatiya klubunun rəhbərliyi tərəfindən futbolçunun təhlükəsizliyi ilə bağlı qəbul edilib".
Bəs “Osiyek” futbolçunu gətirməyəcəkdisə, niyə səfirliyə müraciət edirdi? Yəni icazə verilməyib, yoxsa klub gətirmək istəməyib? Bu sualla yenidən “Zirə”nin meneceri Elman Himayətoğluna müraciət etdik. Onun “Football-plus.az”a söylədikləri:
“Məndə olan məlumat o idi ki, Azərbaycanın Xorvatiyadakı səfirliyinə müraciət ediblər. Amma hər hansı klubun hansısa futbolçunu oyuna gətirib-gətirməyəci ilə bağlı bizə məlumat verilmir. Niyəsini bizə demirlər, onların şəxsi işidi. Mən bununla bağlı nəsə deyə bilmərəm”.
Qeyd edək ki, "Zirə" - "Osiyek" oyunu avqustun 15-də keçiriləcək. Mərkəz müdafiəçisi Styopa Mkrtçyan ilk oyunda start heyətində yer alıb və 63 dəqiqə meydanda olub.
RÖYANƏ OĞUZ
