“Ludoqorets”i “Tofiq Bəhramov”da izləyəndə heç sevməmişdim.

Özündənrazı futbolçular, sərt qayda pozuntuları, yıxılan “Qarabağ”lıları belə özündən çıxarmağa hesablanmış addımlar içimi kinlə doldurmuşdu. İlk oyunda “köhlən atlar”ın qələbəyə layiq olduğunu demirəm. Ona görə ki, komanda sanki özü deyildi. Ən güvənilən futbolçular belə rəqibin hegemonluq etməsinə mane ola bilmirdi. Lakin hadisələr elə cərəyan etdi ki...

“Qarabağ” səfərdə “Ludoqorets”in başına elə oyun açdı ki, ilk oyunda məğlub olduğumuza, cavab matçının səfərdə keçirilməsinə və cütün taleyinə əsas vaxtda aydınlıq gəlməməsinə sevindik. Yoxsa indi 7:2 hesablı qələbədən ləzzət almazdıq. Yeganə üzücü məqam futbolçuların zədələnməsidi ki, burdakı hikmətdən də xəbərdarıq. Axı qələbənin memarları, demək olar ki, sonradan meydana girənlərdi. Bəli, indi, sadəcə, mərhələ adladığımıza görə yox, Bolqarıstanın futbol tarixini yerlə yeksan etdiyimizə görə də sevinirik. “Qarabağ”ın nə dərəcədə böyük uğur qazanması isə sirr deyil. Hər halda, statistikalardan xəbərdarıq...

...o başqa məsələ ki, tarixi qələbə “köhlən atlar”ın Bolqarıstanda cəmi 5 azarkeşlə dəstəklənməsini və komandanın müdafiə xəttinin dərinliyindəki çatışmazlıqları kölgədə qoydu. Klubun Avropada yaşayan azarkeşləriylə münasibətlərə yeni nəfəs verməsi vacibdi. Bəli, dünən “Qarabağ” tərəfdar dəstəyi olmasa belə, rəqibini “al qana boyayacaq” gücdə idi. Axı söhbət sırf tərəfdarın verdiyi gücdən getmir. Biz avrokuboklar çərçivəsində Azərbaycana gələn rəqiblərin fanklublarını tribunalarımızda görürüksə, onlar da görməlidi! Bəlkə “Qarabağ”ın dünən imza atdığı rekordlardan biri də azarkeşlərin sayından daha çox qol vurmasıdı.

Görünür, bu mövsüm “köhlən atlar”ın Avropa macərası uzun çəkəcək. Ən azı arzumuz budu. Belədə nəinki “Tofiq Bəhramov”a, rəqiblərin stadionuna yollanmaq da mənəvi borcdu. Təbii ki, klubun da müəyyən dəstəyi ilə. Komandaya gəlincə, Qurban Qurbanov bu barədə son sözü deyib:

Axı qarşıdan “Dinamo” gəlir. Uğurlar, “Qarabağ”! Siz bu oyunu unudun. Nə biz unudacağıq, nə də “Ludoqorets”...

KƏNAN BAHADIR