Martin Breytveyti yəqin ki, ''Barselona'' fanatları gözəl xatırlayır. Daha öncə ''Esberq'', ''Tuluza'', ''Midlsbro'', ''Bordo'', ''Leqanes''in şərəfini qorumuş danimarkalı forvard 2019/20-nin qış fasiləsində ''Barsa''ya gəlmiş və burda 2,5 il top qovmuşdu.

Son iki mövsümdə ''Espanyol''un uğurları üçün tər tökən Breytveyt bu yay Kataloniya klubundan azad agent statusunda ayrılaraq ''Qremio'' ilə müqavilə imzaladı. ''Espanyol'' ona yeni müqavilə təklif etmədi. Bu arada İspaniyanın ''Marka'' nəşrinin yazdığına görə 33 yaşlı futbolçu ''Espanyol''dan qisas almaq istəyir. O, klubu satın almaq və direktorlar şurasının hamısını qovmaq arzusundadı!

Futbolçunun fikrincə, klub düzgün idarə olunmur. Onu narazı salan odu ki, ötən mövsüm karyerasının ən yaxşı dönəmini keçirməsinə baxmayaraq ''Espanyol'' müqaviləni yeniləmək istəmədi. Halbuki Breytveyt ötən mövsüm 45 oyunda 22 qol, 3 məhsuldar ötürməlik performans sərgiləyərək Kataloniya klubunun La Liqaya qayıtmasında mühüm rol oynamışdı.

Sual oluna bilər ki, Breytveytin klub satın almaq üçün pulu hardandı? Sən demə o, hazırda dünyanın varlı oyunçularından biri imiş. Breytveyt artıq neçə ildi karyerasını davam etdirməklə yanaşı uğurlu biznesini də genişləndirir. Onun İspaniyada restoranı, Fransada geyim dükanı, Amerikada daşınmaz əmlak biznesi var. Hazırda sərvəti 250 milyon avrodan çox olan Breytveytin Amerikada 1500-yə yaxın evi var.

ƏLİ