Bir müddət öncə Kadi Borgesin “Qarabağ”a dönüşü böyük maraqla gözlənilsə də, braziliyalı vinger sonda “Ferentsvaroş”a keçdi.

İndi də 10 gündən artıqdı Azərbaycanda olan Aleksey Kaşukun “Qarabağ”, “Neftçi” və “Sabah”a keçidindən danışılır. Doğrudu, Kaşuk, sadəcə, istirahət etməyə gəldiyini deyib. Lakin davranışı yetərincə şübhəlidi. Qurban Qurbanov “Linkoln”la oyundan sonra Kaşukla bağlı ona ünvanlanan suala klubun dəvət göndərmədiyini demişdi, Krunoslav Renduliç isə vingerin “Sabah”a mümkün geridönüşünə belə aşkar şəkildə reaksiya verməmişdi. Aleksey yayda verdiyi açıqlamada birmənalı şəkildə Avropada oynamaq istədiyini deyirdi. Amma “Şaxtyor”dan sonra klubsuz qalıbsa, vətənində, Avropada hansısa klubla ciddi danışıq aparmaması fikirləri qarışdırır. Bu üzdən də 24 yaşlı hücumçunun Azərbaycanda qalması mümkündü. Doğrudu, Roman Qriqorçuk da onun “Neftçi”yə keçidindən xəbərsiz olduğunu və şəxsi tanışlığının olmadığını söyləmişdi.

Futbolçu karyerasını Azərbaycanda davam etdirəcəksə, “Sabah”a dönüş ehtimalı daha üstündü. Yox, reallığa baxdıqda, həmçinin ukraynalı forvardın Avropada çıxış etmək istəyini nəzərə aldıqda “Qarabağ” variantı daha ideal görünür. Çünki Ağdam təmsilçisinin “Zirə” və “Sabah” ilə müqayisədə Avropada daha uzun müddət çıxış edəcəyi gözlənilir. Eyni zamanda üç cəbhədə mübarizə aparacaq olan “köhlən atlar”ın ən azı hücumun sağında bir solaxay vingerə ehtiyacı var. Əvvəllər Leandro Andradenin alternativi kimi Toral Bayramov həmin mövqedə mübarizə aparırdısa, hazırda Elvin Cəfərquliyevin qırmızı vərəqələri Toralın öz mövqeyində çıxış etməsinin qarşısını alır. “Ludoqorets”lə görüşdə də Yassin Benzya Hamidu Keyta ilə əvəzlənəndən sonra Leandro Benzyanın yerinə çəkilərək, sağ cinahı Keytaya buraxdı. Fəqət fransalı futbolçu həmin mövqedə heç Matteyu Silvanın etdiyini edə bilmədi. Həm bu, həm də Aleksey İsayev ilə dostluq əlaqələrinin fonunda Kaşukun yaxın zamanlarda “Qarabağ”a keçidinin reallaşacağını düşünürəm. Ukraynalı vingerin “Sabah”dakı son mövsümündə forma geydiyi 33 matçda 16 qola imza atması da yaxşı statistikadı. Xülasə “Qarabağ”ın baş tutmayan Kadi transferini Kaşukla unutdurması mümkündü.

KAMAL SƏFƏR