Çempionlar Liqasının 3-cü təsnifat mərhələsində Kiyev ''Dinamo''su ''Reyncers''lə qarşılaşdı. Polşanın Lyublin şəhərində baş tutan görüş 1:1 hesabı ilə bitdi.

Sən demə UEFA tələm-tələsik bu oyunun VAR hakimlərini dəyişməli olub. Çünki bu matçın VAR hakimləri Bartoş Frankovski ilə Tomaş Musyal çox böyük qalmaqalın iştirakçısı olublar. Bu ikili oyundan bir gün öncə əylənmək qərarına gəlib və yerli pablardan birinə yollanıb. Görünür, orda spirtli içkinin miqdarı bir qədər çox olub.

Polşanın ''TVP Sport'' kanalının məlumatına görə hakimlər məkanı saat 01.40-da tərk ediblər. İçkili vəziyyətdə maşın idarə etdikləri üçün Lyublin şəhərinin polisi onları dərhal saxlayıb. Spirtli içkinin miqdarı Frankovskinin qanında 1,7 promilə, Musyalda 1,8 promilə bərabər olub. Bundan başqa onlar daha bir içkili vəziyyətdə olan dostları ilə birlikdə başqa bir olayın da iştirakçısı olublar. Onlar yol nişanlarını oğurlayaraq o cür vəziyyətdə ticarət mərkəzlərindən birinə daxil olubmuşlar. Hər üç şəxs həm də ölkənin yol infrastrukturuna ziyan vurduğunu görə məhkəmə qarşısına çıxmalı olacaq. Bu biabırçılıqlardan sonra UEFA hakimləri dəyişməli olub. VAR-da sözügedən hakimləri Polşadan olan digər cütlük - Tomaş Kvyatkovski və Pavel Malets əvəzləyib.

ƏLİ