Joao Neveşin “Benfika”dan ayrılmaq ehtimalının yüksək olduğu məlum idi. O, artıq Portuqaliya klubunu tərk edib.

“Football-plus.az” xəbər verir ki, PSJ-nin hədəfində olan dayaq yarımmüdafiəçisinin yeni mövsümə məhz bu klubda başlayacağı xəbər verilib. Qeyri-rəsmi mənbələr 19 yaşlı futbolçunun Paris klubuna 100 milyon avroya satılacağını iddia edirdi. Lakin son xəbərdə Fransa nəhənginin “Benfika”ya yalnız 60 milyon avro təzminat ödəyəcəyi bildirilib. Neveşin parislilərlə 5 illik müqavilə imzalayacağı da məlum olub.

“Benfika”nın yetirməsi olan Joao əsas komandada 2022-ci ildən çıxış edir. O, indiyədək “qartallar”ın heyətində 55 oyun keçirib, 3 qolun və bir o qədər məhsuldar ötürmənin müəllifi olub.
Yeri gəlmişkən, PSJ Xavi Simonsu növbəti dəfə icarəyə verib. Klubun rəsmi saytının yaydığı xəbərdə niderlandlı futbolçunun 2024/25 mövsümünü icarə əsasında “Leyptsiq”də keçirəcəyi bildirilib.

21 yaşlı hücumameyilli yarımmüdafiəçi ötən mövsüm də bu status ilə Almaniya klubunda oynayıb. O, ümumilikdə 43 matçda iştirak edib, 10 qol vurub və 15 məhsuldar ötürmə edib.