Avrokuboklarda iştirak edən komandalardan “Qarabağ”a inam və simpatiya daha böyükdü. Bunu sosial şəbəkələrdə yazılanlarla yanaşı, oyun günü tribunalarda da görmək mümkündü. “Qarabağ”ın oyununa bilet satışı elan olunan kimi hər kəs əl-ayağa düşür, bir an öncə tribunada yerini təmin etmək istəyir. Dünən səhər bilet satışı ilə bağlı vəziyyətdən xəbərdar olmaq üçün Tofiq Bəhramov adına Respublika stadionuna üz tutdum. Kassalar saat 11-in yarısında açılacaqdı, ancaq 1 saat əvvəldən yaxınlaşıb, gözləyənlər vardı.

Saat 11 tamam olan kimi bilet satışına start verildi. Dərhal da adamlar 2-2, 3-3 bilet almağa başladı. Növbəyə dayananlar arasında azyaşlılarla yanaşı, 40 yaşdan yuxarı olanlar da var idi. Kimi nəvəsinin istəyi ilə gəlmişdi, kimini də çoxdankı futbol marağı gətirmişdi.

Maraqlıdı ki, kassada 5 və 10 manatlıq biletlər qalmamışdı. Hətta bəzi futbolsevərlər narazılıq edir, gəldiyi kimi əliboş da qayıdırdılar. Kassaya yaxınlaşanlar arasında öz adına 3 biletdən artıq ala bilmədiyinə görə etiraz edənlər də olurdu.

Satışda 15, 20 və 30 manatlıq biletlər qalmışdı. Diqqətimi çəkən nüans adəti üzrə oyuna bir neçə gün qalmış ucuz biletlərin kassalarda bitməsidi. Çox güman, biletin bir qismi artıq “qara bazar”da olacaq. Amma onları “Tofiq Bəhramov” ərazisisində görə bilmədik. Deyilənə görə, belələri sosial şəbəkə vasitəsi ilə də satış təşkil edir.

Satış başlayandan 1 saat ötməmiş 30-40 bilet sahibini tapdı. Həm də 15, 20 və 30 manatlıq. Satıcı xanım saat 7-ə qədər fəaliyyət göstərən kassalara günün ikinci yarısında daha çox adamın yaxınlaşdığını, bəzən də uzun növbələrin olduğunu dedi.