“Kəpəz” yeni mövsümə hazırlığı davam etdirir. Klub bu yaxınlarda Viktor Braqa "1+1" illik müqavilə bağlayıb.

Viktor cinah yarımmüdafiəçisi mövqeyində oynayır. 23 yaşlı oyunçunun son klubu vətənində D seriyasından "Aqiya di Maraba" olub. Braziliyalı futbolçu mövsümün startı ərəfəsində “Football-plus.az”ın suallarını cavablayıb.

- Azərbaycana xoş gəldin. “Kəpəz”i niyə seçdin, necə oldu ki, bu təklif marağını çəkdi?
- Təşəkkür edirəm. “Kəpəz”i klub layihəsinə görə seçdim. Azərbaycana ilk dəfə gəlirəm. Onu bildirim ki, təklif mənə həm də maraqlı gəldi. Ümid edirəm ki, yaxşı olar.

- Komandada necə qarşılandın, Azərbaycanla bağlı ilkin təəssüratın?
- Kollektiv tərəfindən yaxşı qarşılandım. Ölkə haqda təəssüratım da yaxşıdı.

- Bura gələnə qədər Azərbaycanda hansı klubları tanıyırdın?
- Azərbaycandan təklif gələndə çempionat haqda məlumatım az idi. Amma gəldiyimi biləndə tez nəzər saldım. Gördüm ki, çempionat çox rəqabətli, komandaların səviyyəsi əladı.

- Bir futbolçu kimi hədəflərin və gözləntilərin nədi?
- Komanda olaraq, uğurlu çıxış etmək. Bacardığımız qədər yüksək nəticələrt əldə etməyə çalışacağıq. Bütün klub və şəxsi məqsədlərə nail olmaq. Möhtəşəm bir mövsüm keçirmək niyyətindəyik.

- Yeni mövsüm başlayır. Komandaya gec qoşuldun, tam hazırsanmı?
- Bəli, tam hazıram. Ümid edirəm ki, şənbə günündən etibarən azarkeşlərimiz maraqlı və baxımlı oyun izləyəcək.

RÖYANƏ OĞUZ