Yay “transfer pəncərəsi”ndə “Kəpəz”dən ayrılan legionerlərdən biri də Mate Kvirkviyadı. Bir neçə gün öncə gürcüstanlı yarımmüdafiəçinin yeni klubunun adına aydınlıq gəlib. 28 yaşlı futbolçu bundan sonra Cənubi Kipr təmsilçisi “Karmiotissa”nın şərəfini qoruyacaq. Mate “sarı-göylər”in gizli qol silahlarından biri idi. Lakin Gəncə təmsilçisinin sponsor problemi bir-bir keyfiyyətli futbolçuları itirməsinə səbəb oldu.

Mate ilə klubda yaşadıqlarından danışdıq.

- Müəyyən müddət Azərbaycanda yaşadın. Buranı necə xatırlayacaqsan?
- Azərbaycanın bütün istiqanlı insanlarını və dadlı təamlarını heç vaxt unutmayacağam. Ora həmişə əlbimdə qalacaq.

- Yenidən qayıtmaq şansın olsaydı, onda Azərbaycana dönərdin?
- Azərbaycana dönsəm, yalnız “Kəpəz”də oynamaq istəyərəm. Amma gücləndirilmiş və daha peşəkar klub kimi formalaşan “Kəpəz”də.

- “Kəpəz”də səni ən çox nə təəccübləndirdi?
- Hər şey yaxşıdı. “Sarı-göylər” üçün iki mövsüm oynamışam. Məşqçiləri seçsəm, Tərlan Əhmədov və Adil Şükürov ən yaxşılardı. Eləcə də komanda yoldaşlarım da ən yaxşı futbolçulardı. Mən onların böyüklüyünə heyran oldum.

- Bəs onda komandadan niyə ayrıldın?
- Eşitmişəm ki, güya mən “Kəpəz”dən pula görə ayrılmışam. Bu fikir düzgün deyil. Sadəcə, hər gün yalan eşitdiyimə, eyni zamanda peşəkarlıq və futbolçuya hörmət olmadığına görə ayrıldım.

- Klubdan kimsə sənə hörmətsizlik edib?
- Elə buna görə də orda qalmaq istəmədim.

- Sənə yeni müqavilə təklif etdilər?
- Bəli, təklif etmişdilər, amma gülməli idi.

- Gülməli olan nədi? Onların təklif etdiyi müqavilədə hansı şərtlər var idi?
- Bunu deməsəm, daha yaxşı olar.

- Səncə, “Kəpəz” bu mövsüm çempionatda neçənci pillədə qərarlaşacaq?
- Bütün qəlbimlə komandaya uğur arzulamaq istəyirəm. İnanıram ki, qarşıya qoyulan məqsədlərə nail olacaqlar.

- Burdakı komanda yoldaşlarınla danışırsan?
- Bəli, əlbəttə, onlarla əlaqə saxlayıram. Orda ən çox hörmət duyduğum komanda yoldaşlarımdan biri Vurğun Hüseynov idi.

- Yeni klubunda uğurlar arzulayıram. Niyə “Karmiotissa”nı seçdin?
- Təşəkkür edirəm. Maraqlı təklif aldım və imtina edə bilmədim.

- Burda səni sevən azarkeşlərə nə demək istəyirsən?
- Onlara salamlarımı və sevgilərimi göndərirəm. Eyni zamanda demək istəyirəm ki, onları çətin mövsüm gözləyir. Lakin birlikdə hər şeyi bacararlar.

KAMAL SƏFƏR