İkinci liqa təmsilçisi “Şəfa”dan ayrılandan sonra işsiz qalan şəxslərdən biri də baş məşqçi Elşad Məmmədov idi.

AZAL, “Turan”, “Sabah”, hətta “Real”ın akademiyasında təcrübə keçmiş çalışdırıcının hazırda nə işlə məşğul olduğu maraq doğurdu. O, işsiz qalmadığını və artıq “Araz-Naxçıvan”da fəaliyyət göstərdiyini bildirdi:

- Yalnız Mustar Respublika təmsilçisi təklif göndərmişdi, yoxsa başqa təkliflər də var idi?

- Bölgə klublarından təkliflərim var idi. Ondan əlavə həm əvəzedici, həm də ikinci liqa komandalarından bir sıra dəvətlər gəldi. Sadəcə, özümə ən uyğun bura olduğunu düşündüm və seçimimi “Araz-Naxçıvan”dan yana etdim.

- Bəs yeni iş yerinizdə durum necədi? Gənclərin potensialını necə qiymətləndirirsiz?

- Hazırda gənc futbolçularımızın səviyyəsi qənaətbəxşdi. Yeni bir komanda formalaşır. Düşünürəm ki, bu liqada bütün rəqiblərimizi təəccübləndirə biləcəyik. İndi əsasən gənclərin sosial problemlərini həll etmək üçün çalışırıq ki, fikirləri dağınıq olmasın. Mən həmişə demişəm: bu ölkədə isdedadlı gənclər var, sadəcə, əlimizi-qolumuzu çırmalayıb işləməliyik. Həm onları hazırlamalıyıq, həm də öz təhsilimizi artırmalıyıq.

- Təəssüf ki, bir çox hallarda istedadlı gənclər imkanlı, “day-daylı” gənclərə görə irəli gedə bilmir...
- Sizlərin eşitdiklərini bizlər də eşidirik. Əlbəttə, təəssüf hissiylə bildirmək istəyirəm ki, belə arzuolunmaz hallar da olur (əvvələr daha çox olurdu). Ancaq indi belə deməzdim. İndi problem klubların akademiyasındadı. Hər kəs hazır oyunçu istəyir, amma heç kim yetişdirmək istəmir. Klublarımızın sayı artdıqca inşallah, bu problem də aradan qalxar.

- Sizcə, aşağı yaş qruplarında məşqçilik etmək çətindi, yoxsa hər hansı elita və ya 1-2-ci liqa komandasında?

- Düzünü desəm, hər işin öz çətinliyi və məsuliyyəti var. Eyni zamanda hər liqanın öz tələbi var. Ancaq hesab edirəm ki, ən çətini yeniyetmə futboludu. Çünki uşaqlıqdan peşəkarlığa doğru yoldu. Ona görə də bir uşağı hərtərəfli, yəni həm futbolçu, həm də şəxsiyyət kimi yetişdirmək lazımdı.

- Aşağı yaş qruplarına istər dövlət, istərsə də klub tərəfindən lazımi dəstək göstərilirmi? “Sumqayıt”ın baş məşqçisi Samir Abasov “Barselona”nın “La Masiya” akademiyasına işgüzar səfərdən sonra təəssüratını bölüşdükdə aradakı fərqin nə dərəcədə böyük olduğunu görürsən. Bəlkə də onların akademiyaya ayırdığı dəstək heç bizim elita klublarına ayrılmır...

- Hazırda 20 gündü “Araz-Naxçıvan”dayıq. Klubumuz sağ olsun, nə istəmişiksə, hamsını da təmin ediblər. Düşünürəm ki, akademiyalarımızda strategiya formalaşdırmalıdı. Yerli oyunçularımızı yetişdirməliyik, klublar akademiyalarımızdan çıxan oyunçulardan daha çox faydalanmalıdı. Əlbəttə, indiki zamanda biz ispanlarla müqayisə oluna bilmərik. Lakin onların yolu ilə irəliləməliyik. Ən önəmli məsələlərdən biri də budu ki, gənclərimiz daha çox beynəlxalq turnirlərdə iştrak etsinlər.

- Hazırda sizin elə bir planınız varmı?

- Yay fasiləsində klubumuza təkliflər yazıb vermişəm. İnşallah, dəyərləndirərlər. Gənclərimizin ən azı qonşu ölkələrdə keçirilən turnirlərdə iştirak etməsi üçün çalışacağıq.

KAMAL SƏFƏR