“Sumqayıt”ın Konfrans Liqasındakı son akkordları dünən səsləndi. Beləcə Samir Abasovun “bəstə”si maliyyə problemləri içində boğulan “Fehervar”ı məğlub etməyə yetmədi...

Bəli-bəli, problemlər çoxdu. Heyət yetərli deyildi, Murad Xaçayev qırmızı vərəqə almışdı, İsa Suliman zədəli idi, matç səfərdə keçirilirdi, komanda yorğun idi, “Sumqayıt”ın da maliyyə problemləri var, Samir Abasov etiraf etmək istəməsə də, aparıcı oyunçular komandadan ayrılıb və s. və i.a. Amma bunları azarkeşlərə səbəb kimi sırımağa çalışmaq utandırıcı haldı.

Dünən azlıqda qalan “Fehervar” gördüksə, qola ehtiyacı olduğu halda yersiz ötürmələrlə vaxt itirən, hücuma keçməyə cəsarəti olmayan “Sumqayıt”ı da izlədik. Ruhsuz kollektiv, məqsədsiz klub, məyus azarkeş mənzərəsi ağlı başında futbolsevərin qəlbini dağlamaya bilməz. Bu üzdən yuxarıda qeyd olunan “səbəblər” qısa vaxtda aradan qaldırılmalıydı. Günahkar bəllidi: rəhbərlik və baş məşqçi. Əlbəttə, Riad Rəfiyev və havadarları postunu möhkəmləndirməyin yolunu tapacaq. Samir Abasov isə məntiqə sığınsaq, istefa verməlidi. Çempionata köklənmək əsla çıxış yolu deyil. Yenidən bəzi “hakimlərin” yardımı ilə avrokuboklara vəsiqə qazanıb fərqli nəsə etmək mümkün görünmür.

Hakim yardımı ilə gedib “Fehervar”ın kötəyi ilə qayıdan “Sumqayıt” daha yaxşılarına layiqdi. Konfrans Liqası Sumqayıta yaraşdı, amma “Sumqayıt” Konfrans Liqasına yox!

KƏNAN BAHADIR