“Sabah”ın Hayfa “Makkabi”si üzərində qazandığı parlaq qələbə sanki azərbaycanlı azarkeşlərin ürəyinə su səpdi.

Çünki İsrail təmsilçisi əvvəlki illərdə həm “Neftçi”ni, həm də “Xəzər Lənkəran”ı darmadağın etmişdi. Həmin darmadağınlardan sonra “Qarabağ”ın vaxtilə məhz bu komandanı yenməklə İntertoto kubokunda mərhələ adlaması belə yada düşmürdü. Bir növ futbolumuzun “Makkabi”yə qisas borcu var idi.

Doğrusu, hayfalıların “Sabah”a rəqib olduğunu biləndə də rahat deyildim. Düşünürdüm ki, yenə də onlar aşkar favorit kimi növbəti mərhələyə adlayacaq. Ancaq “bayquşlar” rəqibə Kişvardada elə bir dərs keçdi ki, çətin bundan sonra geridönüş edə bilələr. Doğrudu, futbolda hadisələri qabaqlamaq yaxşı əlamət sayılmır. Elə bir neçə gün əvvəl Azərbaycanda hər kəs “Zirə”nin “Şerif”i mübarizədən kənarlaşdıracağına, Avropa Liqasında yoluna davam edəcəyinə inanırdı. Ancaq bir qırmızı vərəqə ilə bütün planlar pozuldu. Odu ki, indi “Sabah” üçün tələsmək istəmirəm. Lakin komandanın oyun üslubu, xüsusən də baş məşqçi Krunoslav Renduliçin əl işi yaxşı mənada sezilir. Doğrusu, xorvatiyalı mütəxəssisdən bu qədərini gözləmirdim. Çünki ötən mövsümün ortalarında təyinat alan Renduliçin “Sabah”ının dəyişkən olduğunu, ancaq sabit oyun sərgiləmədiyini qeyd etmişdim.

“Makkabi”ylə qarşılaşmada gördüm ki, artıq sabit “Sabah” və sistemli oyun üslubu var. Birinci hissədə geri çəkilən, rəqibin hücum zamanı buraxdığı nöqsanları dəyərləndirən və 2-ci hissədə buna uyğun dəyişikliklər edən, xüsusən də Namik Ələskərovu meydana buraxmaqla dahiyanə gediş edən Renduliçin ötən müddətdə futbolçularını nə qədər yaxşı tanıdığını gördük. Kahim Parrisin Ələskərovla əvəzlənməsi öz yerində, yay fasiləsində transfer olunan futbolçuların komandaya bu qədər qısa müddətdə uyğunlaşması da heyranedici məqamdı. Bu qələbəyə hər kəs müəyyən töhfə verdi.

Ötən mövsüm çempionatda görməyə alışdığımız Sekidika – Parris tandemini bu dəfə Sekidika – Mikels tandemi əvəzləmişdi. Lepinitsanın həm yarımmüdafiədə, həm də müdafiədəki fəallığı, fikrimcə, Masazır təmsilçisinin ən böyük problemlərindən biri olan mərkəz xəttindəki zəifliyi aradan qaldırmışdı. Hər iki hissədə düzəlməyən yeganə problem “bayquşlar”ın rəqib təzyiq göstərdiyi anlarda müdafiədən çıxmaqda çətinlik çəkməsidi. Yəqin ki, Renduliç kimi güclü təhlil qabiliyyətinə malik olan mütəxəssis bu problemi də aradan qaldıracaq.

Əlbəttə, səfərdən – “Makkabi”nin Hayfada yox, Kişvardada oynaması bizim problemimiz deyil - böyükhesablı qələbəylə dönmək cütün taleyinin 70 faiz həll olunması deməkdi. Ancaq tam yox. Bu üzdən də komandanın düşərgəsində qarşıdakı həftədə arxayınlığın hökm sürəcəyinə inanmıram. Üstəlik ötənilki acı “Partizan” təcrübəsi də var. Eyni zamanda “Makkabi”nin avrokubok təcrübəsinə görə uzaqbaşı bizim klublardan “Qarabağ”a uduzduğunu da unutmayaq.

İsrail təmsilçisi də cavab oyununda qisas almağa çalışacaq. Lakin “Sabah” belə üstünlüyü əldən verəcəyi halda Renduliç birbaşa məhşər ayağına çəkiləcək. Çünki bundan öncə iki klubumuzun planda olmayan “qırmızı” üzündən nə hala düşdüyünü gördük. Bütün amillər nəzərə alınmalıdı. Az öncə qeyd etdiyim müdafiədə anlaşmada yaşanan çətinliyin və əks-hücuma çıxmağa çalışarkən futbolçuların mövqe seçimində buraxdığı səhvlərin aradan qaldırılması “Sabah” üçün növbəti mərhələnin açarı deməkdi. Bundan sonrası Renduliçlə köməkçilərinə qalır. Yeni tarix yazmaq üçün bircə addım qaldı.

...Hə, bir də Aleksey Kaşukun “Sabah”a dönməsi variantı var. Bu da gerçəkləşərsə, “Qarabağ”ı növbəti mövsüm daha çətin çempionluq mübarizəsi gözləyəcək.

KAMAL SƏFƏR