Günlərin birində səfalı bölgələrimizdən birində yaşayan kəndli oğlunu yanına çağırıb belə deyir: get, qonşunun baltasını gətir! Oğlan gedib əliboş qayıdır və deyir ki, onlarda balta yoxdu. Bu dəfə ata övladını başqa qonşuya göndərir. Yenə “yox” cavabı alan valideynin növbəti istəyi belə olur: onda get özümüzkünü gətir!

Bəli, son illərə qədər balta sözünü işlədəndə çoxunun ağlına belə məzəli əhvalatlar gəlirdi. Lakin indi bu alət əksəriyyətinin yadına xoş olmayan mövzuları salır. Biri elə Əhməd Əhmədovun törətdiyi cinayətdi. Onun balta ilə bütün ailəni qətlə yetirdiyi güman edilir. Hər halda, məhkəmə davam edir, tezliklə həqiqət üzə çıxacaq. İyulun 22-də isə xalq artisti Ağadadaş Ağayevin “Medera” hospitalının mühafizəçisinə tolazladığı balta orda işləyən xanım xadimənin ayağını yaraladı. Futbolumuzun da, daha dəqiqi, “Sumqayıt”ın da “əlibaltalı”sı var. Söhbət Murad Xaçayevdən gedir. Əlbəttə, onu nə Əhməd Əhmədov, nə də Ağadadaş Ağayev ilə eyniləşdirmək olar. Çünki onun “balta”sı kəskin olsa da, cinayət məsuliyyəti yaratmır, sadəcə, mənəvi məsuliyyətdən söhbət gedə bilər.

Bu yarımmüdafiəçini yaxşı tanıyırıq. 1998-ci ildə Ukraynada dünyaya göz açan Murad “Şaxtyor”un yetirməsidi. “Sumqayıt”ın prezidenti Riad Rəfiyevin qətiyyətli səyləriylə yerli futbolçu statusuyla meydana çıxır. Onun ilk “cinayət”i 2021/22 mövsümünə təsadüf edib. Belə ki, premyer-liqanın 8-ci turunda “Sabah”ın qonağı olan “Sumqayıt” darmadağına məruz qalıb (0:3). Məhz bu matçda Xaçayev aqressiv davranışa görə birbaşa qırmızı vərəqə alaraq komandasını azlıqda qoyub. Sonradan “Sumqayıt” futbolçuya verilən 5 oyunluq cəza, 4 min manat cərimə ilə bağlı Appelyasiya Arbitraj Tribunalına müraciət etsə də, şikayəti təmin olunmayıb.

Muradın növbəti qalmaqalı 2023/24 mövsümündə yaşanıb. Özü də premyer-liqanın 35-ci turunda, “Sabah”la matçda! Bəli, doğru xatırlayırsız, həmin oyun məhz Konfrans Liqasına vəsiqə qazanmaq baxımından əhəmiyyətli idi. Lakin Xaçayev avtoqolla yadda qalaraq komandasını çətin duruma saldı ki, 0:2 hesablı məğlubiyyət qeydə alındı. Hər halda, “kimyaçılar” sonuncu turda “Qəbələ”ni məğlub etməklə (1:0) vəsiqəni əldə etdi. Amma azarkeşləri və komandanı bu vəziyyətə salmaq düzgün idimi?!

Xaçayevin növbəti “cinayət”inin qurbanı da “Sumqayıt” oldu. O, 8-ci dəqiqədə ilk, 32-ci dəqiqədə 2-ci sarı vərəqəni almaqla komandasını azlıqda qoydu. Bəli, “Fehervar” kimi güclü rəqib qarşısında! Əvvəldən aqressiv oyunla baş hakim Florian Latanın diqqətini üzərinə çəkən futbolçu “qırmızı”nı haqq etdi. Əlbəttə, hakimin qərəzli qərar verdiyini düşünənlər də var. Düzü, mən belə fikirləşmirəm... İnsaf da yaxşı şeydi. “Sumqayıt” oyuna yetərincə inamlı başlamışdı. Nəinki hesabı açmışdı, ikinci qol üçün fürsət qazanmaqda idi. Amma Xaçayev “baltanı çıxarana” qədər.

Ümumiyyətlə, Xaçayev yığmalarda da özünü yaxşı tərəfdən göstərə bilməyib. Əvvəl U-19 və U-21, sonra əsas yığmanın heyətində meydana çıxan futbolçu perspektiv vəd etməyib. Baxmayaraq ki, 2020/21 “futbol ili”ndən bəri “Sumqayıt”ın əsas heyət üzvü sayılır. Baş məşqçi Samir Abasov da ona güvənir. Bəs Murad dörd mövsüm ərzində 5 qol vurmaqla istər start heyətinə, istərsə də azarkeşlərin sevgisinə nə dərəcədə layiqdi? O, bəlkə də “Sabah”la matçda öz qapısından top keçirərək “gənclik şəhəri”nin təmsilçisinin Avropa Liqasına gedən yolunu bağladı. Ona görə ki, komanda mövsümü “Zirə”dən bir xal geridə bitirdi. O bəlkə də “kimyaçılar”ın uzun Konfrans Liqası macərasını başlamadan başa çatdırdı...

İndi “Sumqayıt”ın prezidenti Riad Rəfiyev daha çox düşünməlidi. Samir Abasov heyətin yetərli olmadığını dediyi halda, transferlərin reallaşmaması kimin günahıdı?

KƏNAN BAHADIR