“Səfər oyunlarında yayının keyfiyyətinə zəmanət verə bilmirik” – “CBC Sport”dan reaksiya
Çempionlar Liqasının 2-ci təsnifat mərhələsinin “Linkoln” – “Qarabağ” (0:2) matçını “CBC Sport” kanalı vasitəsiylə izləyə bildik. Təbii, buna izləmək demək mümkündüsə...
Cəbəllütariq vaxtı ilə saat 18.00-da başlayan oyun zamanı meydanın müəyyən hissələrində gedən mübarizəni görmədik. Çəkiliş qeyri-peşəkarcasına və çox aşağı səviyyədə gerçəkləşdi. Sanki oyunu çəkənlər peşəkar televiziya operatorları yox, mağara toyunda təsadüfən əlinə kamera alan kənd cavanları idi. Bəs “CBC Sport” çəkilişin keyfiyyətindən nə dərəcədə razıdı? Bu mövzu ilə bağlı kanalın baş redaktoru Şəmsəddin Abbasovla əlaqə saxladıq. Onun “Football-plus.az”a söylədikləri:
“Ev sahibi tərəfin oyunu çəkmək planı yox idi. Bunu biləndən sonra bizim kanalın rəhbəri Volkan Üst İspaniyadan mini STS (səyyar telestudiya) sifariş verib. Buna görə “CBC Sport” ödəniş edib. Keyfiyyət yüksək olmasa da, əsas odu ki, oyunun yayınını təşkil edə bildik. Qarşı tərəf bundan artıq keyfiyyətli çəkiliş bizə təqdim edə bilmirdi. İndi hər dəfə “CBC Sport”un yayın keyfiyyətində nöqsan axtarılacaq? Bir şeyi bilmək lazımdı ki, səfər oyunlarında yayının keyfiyyətinə zəmanət verə bilmirik. Çünki heç bir halda bu çəkilişdə iştirak edə bilmirik. Əsas odu ki, yayımı əldə etdik. Onu orda kim necə çəkirsə, buna müdaxilə edə bilmirik”.
KAMAL SƏFƏR
Digər xəbərlər
