AÇ-2024-də finalçılar bəlli oldu. İkinci yarımfinal matçında İngiltərə Niderland üzərində 2:1 hesablı əzmkar qələbə qazandı.

Beləliklə, iyulun 14-də Berlindəki ''Olimpiaştadion''da baş tutacaq finalda İspaniya ilə İngiltərə qarşılaşacaq. Niderlandla oyunda penaltidən bərabərlik qolunu vuran Harri Keyn tarixi göstəriciyə nail oldu. O, ümumilikdə AÇ-də 7-ci dəfə qol sevinci yaşadı. Bununla da Keyn AÇ-lərdə ən məhsuldar ingiltərəli futbolçu statusunda olan əfsanəvi Alan Şirerin rekordunu təkrarladı. Çox tənqid olunmasına baxmayaraq Qaret Sautqeyt İngiltərəni ardıcıl ikinci dəfə AÇ-nin finalına daşımağı bacardı. Buna qədər futbol tarixində cəmi iki məşqçi AÇ-lərdə iki dəfə final həyəcanı yaşayıb.

Maraqlıdı ki, onların hər ikisi almandı. İlk belə mütəxəssis Helmut Şön olub. Əfsanəvi çalışdırıcı AÇ-1972 və AÇ-1976-da Almaniyanı finala daşıyıb. Onun komandası hər iki finaldan qələbə ilə ayrılıb. 1990-cı illərdə isə bunu Berti Foqts bacarıb. Bir ara yığmamızı da çalışdıran Foqts bundestimi AÇ-1992-nin və AÇ-1996-nın finalına daşımışdı. Onun komandası ilk finaldan məğlub ayrılsa da, ikinci finaldan qalib ayrılmışdı. Amma həm Şönün, həm Foqtsun dönəmində iştirakçı sayı az idi. Ona görə də Sautqeytin göstəricisini daha üstün saymaq olar.

ƏLİ