“2008 təvəllüdlü 5 futbolçumuza şans verildiyinə görə...” – 0:13-ü necə izah etdi?
“Turan Tovuz”un 2-ci liqa təmsilçisi “Şəmkir”i yoxlama oyununda 13 cavabsız qolla məğlub etdiyini xəbər vermişdik.
Əlbəttə, liqalararası səviyyə fərqini nəzərə alsaq, tovuzluların qələbə qazanacağı, hətta bu qələbənin böyük hesabla olacağı da gözlənilən idi. Lakin 13 topluq fərq, yəni təxminən hər 7 dəqiqəyə bir qol vurulması meydanda sanki futbol yox, həndbol oynanıldığına işarədi. Bəs aşağı liqa təmsilçisinin belə böyükhesablı məğlubiyyətinə nə səbəb oldu? Klub prezidenti Vüsal Məmmədov “Football-plus.az”a mövzu ilə bağlı bunları dedi:
“Bilindiyi kimi, yoxlama matçı idi və seleksiya xarakteri daşıyırdı. Yəni nəticə o qədər də önəmli deyildi. Birinci hissədə əsas heyətlə oynadığımıza görə 3 top fərqlə geridəydik. Lakin ikinci yarıda daha çox gənclərə, xüsusən də 2008 təvəllüdlü 5 futbolçumuza şans verildiyinə görə ümumilikdə 13 top fərqi ilə məğlub olduq. Ancaq bizim üçün əsas olan futbolçularımızın potensialını üzə çıxarmaq idi. “Turan Tovuz” kimi elita təmsilçisiylə qarşılaşmaq bizim üçün təcrübə baxımından daha önəmlidi”.
“Şəmkir”in rəhbəri komandanın növbəti mövsüm üçün hədəfini də açıqladı:
“Maliyyə baxımından heç bir sıxıntımız yoxdu. Növbəti mövsüm üçün hədəfimiz ilk “üçlüy”ə düşməkdi. Transfer siyasətimizə gəlincə, razılaşdığımız, danışıqlar apardığımız və hazırda baxışda olan futbolçular var”.
Xatırladaq ki, “Şəmkir” ötən mövsüm 16 komanda arasında 14-cü olmuşdu.
KAMAL SƏFƏR
Digər xəbərlər
