Dorival Juniorun aqibəti necə olacaq?
Braziliya yığmasının Amerika Kubokunu erkən tərk etməsi Dorival Juniorla bağlı müxtəlif ehtimallara yol açıb.
Komandanın 1/4 finalında Uruqvaya uduzması (0:0, p. - 2:4) baş məşqçinin istefaya göndərilə biləcəyi haqda xəbərlərlə müşayiət olunub.
Lakin Braziliya Futbol Konfederasiyasının (BFK) rəhbərliyi təcrübəli çalışdırıcı ilə bağlı fərqli qərar verib. Yerli KİV-in yaydığı xəbərdə milli komanda Amerika Kubokunda mübarizəni dayandırsa da, mütəxəssislə əməkdaşlığın davam etdiriləcəyi bildirilir. Bu barədə BFK-nın prezidenti Ednaldo Rodriges konkret açıqlama verib:
“İki aydan sonra dünya çempionatına vəsiqə uğrunda oyunlar başlayacaq və plan belədi: Dorival Junior ilə birgə işi davam etdirəcəyik. Baş məşqçi nəyin səhv olduğunu yaxşı bilir. Uğursuzluqdan nəticə çıxarmaqla rəqabətədavamlı komanda qura bilərik. Layihənin əsas hədəfi budu. Çünki hər dəfə dəyişiklik edəndə işə yenidən başlayırsan və bu həmişə daha çətin olur”.
Digər xəbərlər
