Portuqaliyalı futbol agenti Paulo Barboza Rusiya mətbuatına verdiyi müsahibədə yığmasının Sloveniya ilə oyunu və Kriştiano Ronaldonun davranışı haqda danışıb.

- Portuqaliya – Sloveniya oyunundan çıxardığınız əsas nəticə?
- Bəxtimiz onda gətirdi ki, üç penalti qaytaran qapıçımız var. Hesab edirəm ki, Portuqaliya yığması bundan qat-qat güclü oynaya bilər. Burda isə hər şey penalti seriyasında həll olundu. Hadisələrin axarı istənilən tərəfə ola bilərdi. Burda bəxtdən danışmaq lazımdı.

- Portuqaliya yığması əsas vaxtda qələbə yolunda lazımi fədakarlığı etmədi?
- Hesab edirəm ki, yığmanız bu turnirin əvvəlki oyunlarında olduğu kimi, yenə də yetərincə zəif oynadı. Mən artıq dəfələrlə problemlə bağlı danışmışam. Söhbət Kriştiano Ronaldodan asılılıqdan gedir. Gördüyünüz kimi, bu məsələ heç cür həll olunmur. O, yenə start heyətində çıxdı, 120 dəqiqə oynadı... Bu mövzuda artıq zarafat edirik, Fransa ilə oyundan sonra nə danışacağıq? Hələ ki heç kim Portuqaliyanın yarımfinala vəsiqə qazanacağına əmin deyil. Biz nümayiş etditrməyə qadir olduğumuz formadan uzağıq. Düzdü, Fransada da indi işlər qaydasında deyil. Ancaq ilk növbədə özümüz haqda düşünək. Baş məşqçi heyətlə bağlı heç bir nəticə çıxarmır. Təəssüf ki, hər şey belədi. Hər dəfə eyni şeylər təkrarlanır.

- Sizi düşündürən əsas sual yenə də budu ki, niyə Ronaldo meydana start heyətində çıxır?
- Hər kəsə aydındı ki, onda artıq alınmır, daha bu səviyyədə qol vura bilmir. Ancaq baş məşqçi inadla ona inanır. Sloveniya ilə oyunda Kriştiano, ümumiyyətlə, hər şeyi öz üzərinə götürdü. Bütün cərimə zərbələrini yerinə yetirdi, özünü bütün toplara toxundurmağa çalışdı...

- Bu oyunla bağlı Martinesə ünvanlanası başqa suallar da varmı?
- Onun əvəzetmələrini anlamadım. Vitinya ilə Rafael Leaonu niyə meydandan aldı? Onlar meydanda ən yaxşılardan idi! Belə görünür ki, Martines, sadəcə, vacib oyunda meydana optimal heyət buraxmağa qadir deyil.

- Hesab edirsiz ki, Sloveniyaya qarşı ilk dəqiqələrdən hücumun mərkəzində Ronaldo yox, Ramuş oynamalıydı?
- Bəli, əlbəttə. Ancaq Martines Ramuşu heyətə qoya bilməz.

- Niyə?
- PSJ-nin forvardı öz oyununu göstərsə, onda hər kəs sual verəcək ki, bəs AÇ-yə Ronaldonu niyə aparmısan? Baş məşqçi bunu istəmir, ehtiyatlanır. Hətta Gürcüstanla heç nəyi həll etməyən oyunda da meydana Ramuş yox, Ronaldo çıxdı. Yaxşı, Martines Ronaldonu Sloveniya ilə oyunda da start heyətinə saldı. Ancaq onu əvəz etmək lazım idi. Adam əvvəlki kimi oynamağa qadir deyil. Doğrudanmı aydın deyil? Biz isə onun girovu olmuşuq... Kədərlidi. Nəticədə Portuqaliya bütün potensialını göstərmir. Hamı məyusdu.

- Ronaldonun boşa verdiyi penaltidən sonra göz yaşlarını görəndə nə hiss etdiz?
- Burda nə deyəsən... O, həmişə diqqət mərkəzində olmaq istəyir. Elə oyunlar olub ki, məğlubiyyətdən sonra nümayişkaranə şəkildə paltardəyişmə otağına qaçıb... Kapitan sarğısını atdığı hallar da olub. Göz yaşı hisslərin ifadəsidi. Ancaq indiki halda mənə elə gəlir ki, Ronaldo həm də bütün kameraların onu çəkməsini, başqalarının ona yazığı gəlməsini istəyirdi. Bilmirəm. Bu necəsə kişicəsinə hərəkət deyil. Yaxşı, penaltini vura bilmədin. Ancaq başqaları penaltini vura bilməyəndə ağlamırlar axı! Niyə yalnız Kriştiano emosiyalarına bu şəkildə meydan verir? Bir daha təkrarlayıram: sadəcə, Ronaldo istəyir ki, onun haqqında danışsınlar, yazsınlar.