Qabriel Paulista ilə Rafa Silvanı transfer edən, Salih Uçanla müqaviləni yeniləyən “Beşiktaş” transfer çalışmalarını davam etdirir. İstanbul nəhənginin AÇ-2024-ün ardından daha iki futbolçu ilə anlaşacağı gözlənilir.

İlk növbədə müqavilə müddəti bitən Cenk Tosunla yeni müqavilə imzalanacaq. “Fənərbaxça”nın da hədəfində olan təcrübəli futbolçu ilə nəhayət, anlaşmaq mümkün olub. Bundan başqa, Yusuf Yazıcının da keçidinin tezliklə bitəcəyi güman edilir. “Lill”dən ayrılan və azad agent statusuna malik Yusufu yeni baş məşqçi Covanni van Bronkhorst da komandada görməyi çox istəyir. Digər tərəfdən, Anxel Di Mariya, Mats Hummels və Sebastyan Alle kimi ulduz isimlərlə danışıqlar davam edir. Bu təcrübəli oyunçular heç cür “Beşiktaş”la bağlı qərar verə bilmirlər. Ona görə də rəhbərlik onlara həftəsonuna qədər vaxt verib.

“Qartal” Hummels ilə yanaşı, müdafiə xəttini Mario Ermoso ilə gücləndirmək istəyir. “Atletiko”dan ayrılan Ermoso da Hummels kimi azad agent statusundadı. 29 yaşlı futbolçunun meneceri İstanbula dəvət olunub. “Real”ın akademiyasında yetişən və 2019-dan bəri “Atletiko”nun şərəfini qoruyan ispaniyalı futbolçu ötən mövsüm 45 rəsmi oyunda forma geyib.

Yeri gəlmişkən, “Beşiktaş” bir futbolçu ilə yollarını ayırıb. Klubdan verilən məlumatda qeyd olunur ki, Valentin Rozyenin 2025-ci ilə qədər nəzərdə tutulan müqaviləsi qarşılıqlı anlaşma sayəsində ləğv edilib. Ona görə də komanda bu futbolçunun satışından pul qazana bilməyəcək. Rozye dərhal özünə yeni klub tapıb. O, dünən İspaniyaya yollanaraq tibbi müayinədən keçib. 27 yaşlı futbolçun 4 illik fasilədən sonra La Liqaya qayıdan “Leqanes”ə transfer olunub. Sağ müdafiəçi mövqeyində oynayan Rozye İstanbul məhənginə 2020-ci ildə “Sportinq”dən gəlmişdi. İlk mövsümdə inamlı təsir bağışlayan və Sərgən Yalçının dönəmində qazanılan çempionluqda heç də az rol oynamayan fransalı futbolçu fanatların sevimlisinə çevrilmişdi. Amma növbəti mövsümlərdə bu səviyyəni qoruya bilmədi. Rozye ötən mövsümün ikinci dövrəsini icarə əsasında “Nitsa”da keçirdi. Ümimilikdə bu futbolçu 4 mövsüm ərzində “Beşiktaş”da 126 rəsmi oyunda 6 qol, 18 məhsuldar ötürməlik performans sərgilədi və 3 titul qazandı.