Azərbaycanda çalışan türkiyəli Montellanın oyun üslubunu bəyənmədi
AÇ-2024-də mübarizə aparan Türkiyə millisi bir çox mütəxəssisin turnirin kəşfi adlandırdığı Avstriyanı məğlub etməklə 1/4 finala adladı.
Qardaş ölkənin futbol yığması üçün böyük önəm kəsb edən görüşdə hər iki qolu “Yuventus” və “Atalanta” kimi klublarda forma geymiş, hazırda karyerasını Səudiyyə Ərəbistanında davam etdirən Merih Dəmiral vurdu. Dublu “bozqurd” işarəsiylə qeyd edən 26 yaşlı müdafiəçini dünən UEFA sərt şəkildə cəzalandırdı. Futbol ictimaiyyətini bəzi nümayəndələri cəzanın düzgün olmadığını və qitə futbol qurumunun bu məsələyə qərəzli yanaşdığını bildirir. Hazırda “Xəzri” basketbol komandasına rəhbərlik edən Murat Dikmənin bu mövzuda fikirlərini öyrənməyi lazım bildik:
“Bu cəzanı tam yanlış qiymətləndirirəm. Merihin hərəkəti siyasi və ya irqçi bir davranış deyil. Türklüyün rəmzi sayılan bir hərəkətdi və Merih də sevincini belə yaşadı. Ədalətli qərar deyil, sadəcə, Türkiyə milli komandasının qarşısını kəsmək üçün atılmış bir addımdı”.
- Bəs, Türkiyə millisinin önünü kəsməyi bacaracaqlarmı? Yəni qardaşlarımız 1/4 finalda Niderland səddini keçə biləcəkmi? Yığmanın potensialı buna çatarmı?
- Önümüzü kəsməyi heç vaxt bacarmayacaqlar. Çünki türklər hər zaman belə işlərin öhdəsindən gəlir. Oyuna gəlincə, Niderland yaxşı komandadı. Əfsuslar olsun ki, biz də turnirdə ümumi komanda olaraq yaxşı oynamadıq və sadəcə, futbolçuların fərdi keyfiyyətləri hesabına nəsə etdik. Niderlandla görüşdə də kollektiv şəkildə oynasaq, növbəti mərhələyə adlayacağımızı düşünürəm.
- Vinçentso Montellanın işini necə dəyərləndirirsiz? Komandanın sabit oyun sisteminin olmadığı görünür...
- Təəssüf ki, onun fəaliyyətini yaxşı qiymətləndirə bilmirəm. Komandaya 4-6-0 kimi hücumçusuz bir sistem tətbiq edir və bəzi futbolçularda çox israrlıdı. Hücumçusuz qarşılaşma, mübarizələr yaxşı deyil.
KAMAL SƏFƏR
Digər xəbərlər
