"Almaniyada azarkeşlərin istədiyi, əsl futbol festivalı ab-havası var. Müxtəlif ölkələrdən olan azarkeşlər oyunları birlikdə, dostcasına izləyirlər. Futbol çılğınlığı sevir. Burda bir çox azarkeşlər matça fərqli formada gəlməyi, əsl fevstival havası yaratmağı, öz ölkələrinə aid geyimlərdə gəlməyi sevirlər. Alban azarkeşlər formaları, bayraqları ilə yanaşı, xüsusi milli papaqlarından da istifadə edirlər. İngiltərə, Serbiya azarkeşləri çılğınlıqları ilə seçilsə də, məncə, stadionda ən çox səs, yüksək enerji yaradan türkiyəli azarkeşləri oldu. Tribunalarda boş yer yoxdu. Nəinki Almaniyaya həmsərhəd ölkələrdən, hətta Braziliyadan da sırf oyunları izləmək üçün gələnlər var. Braziliyalı azarkeşlə söhbətləşərkən dedim ki, paralel şəkildə Kopa Amerika da gedir, nədən onu oyub bura gəlmisən? Dediyinə görə, Kopa Amerika onun üçün Avropa çempionatı qədər maraqlı deyil. Bu üzdən 12 saat uçaraq burdakı oyunları canlı izləmək istəyir, buranın ab-havası çox bəyənir. Qeyd edim ki, Almaniyada yaşayan həmyerlilərimiz də matçlara fəal şəkildə gedirlər. Tribunalarda Azərbaycan bayrağı da müşahidə etmişəm. Sonuncu dəfə Türkiyənin matçında meydanda xeyli bayrağımızı gördüm. Bu da təbii ki, bizi sevindirir".