Qətərin faktiki rüşvət hesabına dünya çempionatı kimi turnirin evsahibliyi hüququna yiyələnməsi heç kimə sirr deyil.

Bunu FİFA-nın sabiq prezidenti Yozef Blatter də dəfələrlə etiraf edib. Qətər yenə də pul hesabına bütün arzularına çatmaqda davam edir. Turnirin startına az qalmış ölkədə DÇ ab-havasının olmaması, küçələrdə fanatların görünməməsi tənqidlərə səbəb olmuşdu. Qətərlilər bu problemi də ''fenomenal'' şəkildə həll edib. Belə ki, ölkədəki xarici ölkə vətəndaşlarından pul hesabına süni azarkeşlər yaradılıb! Söhbət ilk növbədə Pakistan və Hindistan vətəndaşlarından gedir. Onların bəziləri hətta xüsusi olaraq ölkəyə dəvət edilib.

Srağagün sosial şəbəkələrdə bununla bağlı maraqlı görüntülər yayıldı. Ən birinci qəribə videolar ''TikTok''da 400 mindən artıq izləyicisi olan ''Qatari Living'' səhifəsində yerləşdirildi. Orda Braziliya, Argentina, Almaniya, İngiltərə və başqar ölkələrin ayrı-ayrı azarkeş qruplarının görüntüləri yer aldı. Özü də hər azarkeş qrupunda 100-dən çox insan yer alırdı. Onlar əylənir, sevimli yığmalarının lehinə təzahüratlar səsləndirir və bir növ mundial ab-havası yaradırdılar. Amma diqqətlə baxanda görünür ki, bu şəxslərin böyük əksəriyyəti heç də azarkeşlik etdikləri ölkənin vətəndaşları deyil! Kiçik bir araşdırma aparmaq bunların pulla tutulan süni azarkeşlər olduğunu üzə çıxarmaq üçün yetərli oldu. Qətər hökumətinin bu cür fanatları gündəlik 10 dollar və 3 dəfə yemək qarşılığında faktiki icarəyə götürdüyü məlum olub. Onlara azarkeşlik etməli olduqları ölkələrin formaları və bayraqları, eləcə də musiqi alətləri verilib. Bu ''azarkeşlərdən'' mundialın gedişində də istifadə olunacaq. Oyunlardan öncə tribunada boşluqlar olacağı təqdirdə onlar, eləcə də yaxınlıqdakı xarici ölkə vətəndaşı olan inşaat işçiləri pulları ödənilərək stadiona buraxılacaq! Maraqlıdı ki, Qətər bununla kifayətlənməyərək bir qədər də irəli gedib.

İngiltərənin ''Tayms'' nəşrinin iddiasına görə, Qətər hökuməti hər ölkədən 40-a yaxın azarkeşlə gizli sövdələşməyə gedib. Həmin azarkeşlər sosial şəbəkələrdə Qətər və təşkilatçılıq haqda yalnız xoş söz yazmalıdılar! Yəni onlara ölkə haqda hər yerdə xoş imic formalaşdırmaq tapşırığı verilib. Bunun qarşılığında onlara Qətərdə 2 həftəliyə inanılmaz şərait yaradılacaq. Həmin azarkeşlər 5 ulduzlu otellərə yerləşdiriləcək və onlara gündəlik 60 funt sterlinq ödəniləcək. Bundan başqa, onlara öz yığmalarının oyununu izləmək, eləcə də ölkənin istənilən nöqtəsinə yollanmaq tam pulsuz başa gələcək!

Bu arada sosial şəbəkələrdəki azarkeşlərin görüntüləri tənqid atəşinə tutulduqdan sonra ''Qatar Living'' şirkətinin marketinq və ictimaiyyətlə əlaqələr üzrə baş meneceri Məhəmməd Nudin, necə deyərlər, aranı sakitləşdirməyə çalışıb: ''Bu insanlar Qətərdə işləyirlər. Onlar simpatiya duyduqları ölkəyə azarkeşlik edirlər. Məsələn, Argentinanı sevənlər bu ölkənin fan-qrupuna qoşulublar. Onların heç də hamısı mühacirlər və inşaat işçiləri deyil. Aralarında başqa sahənin adamları da var. Bizdə, məsələn, hindistanlılar çoxdu. Hindistan isə DÇ-də iştirak etmir. Ona görə də onların çoxu başqa ölkəyə azarkeşlik etmək məcburiyyətində qalır. Onlar hansı futbolçunu sevirlərsə, onun yığmasına azarkeşlik etməyə üstünlük verirlər”.