“Boston” çempionluğun astanasındadı - Əvvəlki 156 halda 0:3 uduzan komanda geridönüş edə bilməyib
Srağagün MBA-nın final seriyasında 3-cü oyun keçirildi.
“Football-plus.az” xəbər verir ki, “Boston” bu dəfə də “Dallas”ı məğlub etməklə seriyada böyük üstünlük qazandı – 3:0. Seriyanın həlledici ola biləcək 4-cü oyunu bu gün keçiriləcək. “Dallas”ın oyun qurucusu Luka Donçiç bu dəfə də komandasının uduzmaması üçün əlindən gələni etdi. 27 xal, 6 məhsuldar ötürmə və 6 ribaund ilə yadda qalan sloveniyalı ulduz sona 4 dəqiqə qalmış 6-ci dəfə cəzalanaraq parketi vaxtından əvvəl tərk etdi. Amma Donçiç 0:3-dən sonra da qələbə ümidini itirmir. O, oyunsonrası mətbuat konfransında həmkarımızın “komanda 4-cü oyuna necə köklənəcək” sualına belə cavab verib:
“İnanmağa davam edirik. Müntəzəm mövsümdə 5 və ya 6 məğlubiyyətdən ibarət seriyamız olmuşdu. Ardından hadisələrin axarını dəyişə bildik, 19 oyunun 17-də qalib gəlməklə pley-offa birbaşa vəsiqə qazandıq. Anlayıram ki, o müntəzəm mövsüm idi, ancaq elə çətin məqamda toparlana, birləşə bildik, atmosfer dəfələrlə yaxşılaşdı. Biz, sadəcə, uğura inanmaqdayıq. Bu məsələni artıq paltardəyişmə otağında müzakirə etmişik. Buna qadir olduğumuzu bilirəm. Lap son ana qədər təslim olmayacağıq”.
Əlbəttə, nikbinlik, ümidlə yaşamaq hər bir idmançı üçün müsbət keyfiyyətdi. Ancaq tarixi statistika Donçiç və komandası üçün heç bir əlyeri qoymur. MBA-nın pley-offu tarixində 157-ci dəfə komandalardan biri seriyanın gedişində 3:0 önə çıxıb. Maraqlıdı ki, əvvəlki 156 halın heç birində ilk üç oyunda uduzan komanda sonda seriyanı qalib kimi bitirə bilməyib. Yalnız 4 dəfə 0:3 geri düşən komanda hesabı bərabərləşdirə, seriyanı 7-ci oyuna qədər davam etdirə bilib. Ancaq sonda yenə də qələbə startda 3:0 önə çıxan komandanın olub.
Dallas – Boston 99:106 (31:30, 20:20, 19:35, 29:21)
Seriyada hesab – 0:3.
Digər xəbərlər
