“Şəfa” Futbol Klubunu 2022-ci ilin dekabrında rebrendinq edərək, yenidən fəaliyyətə başlatdıqdan sonra klubla birlikdə xeyli yol qət etdik. Gördüyümüz işlərin nəticəsi olaraq, kluba yeni yaradılan 2-ci liqa adlı çempionatda iştirak üçün vəsiqə verildi. Liqanın ilk dövrəsində yaşanan maddi problemlər səbəbindən eniş-yoxuşlu mövsüm keçirsək də, klubun dağılmaması üçün mübarizə apardım və nəticədə klub fəaliyyətinə davam etdi. Bu gün isə klubla yollarımın rəsmən ayrıldığını bildirirəm. "Şəfa" adına 1 il yarıma yaxın müddətdi apardığım fəaliyyətim və əziyətim rəsmən sona çatdı. Bu 1 il yarım müddət ərzində "Şəfa"da ilk əvvəl SMM, daha sonra isə baş məşqçi köməkçisi, futbolçu, hətta baş məşqçi kimi fəaliyyətim oldu. Bu klub üçün, bu forma üçün ən çox can qoyan şəxslərdən biri olaraq, klubla birlikdə eniş-yoxuşlu günlər yaşadım. Gün oldu ciddi maaş problemləri oldu, maliyyə yox idi və klubu ayaqda saxlamaq üçün hər hansı bir çıxış yolu axtarırdım. Bir ətrafımda olan adamlar bilir ki bu klub üçün nələr çəkdim. Əsəb, stress, gərginlik, sıxıntılar, sevincli günlər də var idi. Gün oldu klubdan gedib-getməmək arasında qalsam da, qalıb sonadək mübarizə aparmağı seçdim. Bilənlər də bilir ki, mən də buranı tərk etsəydim, klub vaxtından əvvəl çempionatı tərk edəcəkdi. Orda qalıb sonadək mənimlə gedən futbolçulara da sonsuz təşəkkürümü bildirirəm. İlk dövrədə çıxışımız uğursuz olsa da, ən azı klubu dağılmağa qoymadıq. Klubda olduğum müddətdə üç dəfə rəhbərlik dəyişdi, heyətdə xeyli futbolçularla yollar ayrıldı, yeni futbolçular cəlb olundu. Lakin sonda bu forma uğrunda sonadək mübarizə aparmağa davam etdim. Sonda isə demək istəyirəm ki, "Şəfa" mənim üçün ilyarım müddətə can qoyduğum böyük bir ailə oldu və burda həm həyat, həm də futbol təcrübəsi adına həddən artıq çox şey qazandım. Ümid edirəm ki, “Şəfa” bundan sonra uğursuzluq zolağından qurtular və layiqli çıxış etməyə davam edər”.

“Bunun çox səbəbi var. Çempionatı belə başa çatdırmaq istəməzdik. Komandadakı futbolçu çatışmazlığı özünü göstərdi. Ehtiyat oyunçularımız az idi. İlk dövrədə olan təcrübəsizlik və oyunçu limitin doldurulması uzun marafonda çətinlik yaratdı. İkinci dövrəyə də çox pis təsir etdi. İkinci dövrədə cəmi 9 nəfərlik transfer limitimiz qalmışdı. Komandada zədə problemləri də oldu. Ardıcıl 2-3 oyuna eyni heyətlə çıxa bilmirdik. Ümid bəslədiyimiz oyunçulardan da çox yararlana bilmədik. Bəzi komanda yoldaşlarımız cəza səbəbindən bir çox matçı buraxdı və sabit heyəti qoruya bilmədik. Bizə məqsəd qoyulmuşdu ki, komanda mövsümü sonuncu pillədə bitirməsin və çalışdığımız qədər bunu yerinə yetirdik. Elə ikinci dövrədə ən çox xal toplayan 5 komandadan biri də “Şəfa” idi. Burda baş məşqçinin böyük rolu var idi. Elşad Məmmədovun komandadan ayrılması bizim üçün gözlənilməz oldu. Lakin hamımız elə bilirdik ki, Elşad müəllim klubda qalacaq. İkinci dövrədə də onun əziyyəti həddinən artıq çox olub. Yeni rəhbərliyin öz adamları və planları var. Biz həmin planlara daxil deyilik. Onlara bu işdə uğurlar arzulayırıq. Gələcək karyerama gəlincə, hazırda 2-ci liqada bir neçə klubla danışıqlar gedir. İnşallah, xeyirlisi olar”.

“İkinci dövrədə ən çox xal qazanan 5 komandadan biriyik. Ən gənc heyətlə işlədik. Çətin və əziyyətli olsa da, oyunçularım minimum əmək haqqı ilə oynayırdılar. Bu neqativ hallara baxmayaraq, xalımızı 18-ə çatdırdıq. Yeni rəhbərliyi bu işlərimiz, yəqin ki, qane etməyib. Bizim işlədiyimiz şərtlərlə, həmin maliyyə ilə gəlib, daha yaxşısını göstərsinlər, biz də alqışlayaq. Bu futboldu, belədi. Hər kəsin öz adamları var. Bilən və ya bilməyən - bu ölkədə fərq etmir. Uğurlar arzulayıram”.