Xaqani Məmmədov futboldan ömürlük uzaqlaşdırılacaq?
“Araz-Naxçıvan” ötən mövsümə yaxşı başladı, amma pis bitirdi.
Maraqlıdı ki, az qala mövsüm boyunca klub ətrafında müəyyən söz-söhbətlər yarandı. Azər Bağırovun gözlənilməz istefasından sonra uzun müddət “dillərə düşən” Naxçıvan təmsilçisinin indiki dərdi də məşqçi ilə bağlıdı. Daha doğrusu, Elmar Baxşıyevin köməkçilərindən olan Xaqani Məmmədov klub rəsmilərini seçim arasında qoyub. Təcrübəli məşqçi bir neçə gün əvvəl “Araz-Naxçıvan”dan ayrılıb. Rəhbərlik digər məşqçilərdən fərqli onunla müqavilə müddətini uzaltmaq istəməyib.
İddialara görə Xəqani Məmmədovun qeyri-leqal bukmeker kontorlarına pul qoyuluşu etməsinə dair şübhələr var. Hətta UEFA-dan bununla bağlı AFFA-ya araşdırma aparmaq tapşırılıb. İddialar doğrularsa, o, futboldan ömürlük uzaqlaşdırıla bilər. Hazırda adı çəkilən mütəxəssislə bağlı araşdırma gedir.
Məlum məsələ ilə bağlı klubun mövqeyini öyrənmək üçün “Araz-Naxçıvan”ın icraçı direktoru Eldəniz Yusubovla əlaqə saxladıq:
“Xaqani Məmmədovun oyunlara pul qoyuluşu etməsinə dair bizdə heç bir dəqiq məlumat yoxdu. Onunla nərərdə tutulan müqaviləninin müddətini uzatmamışıq. Hazırda bizim əməkdaş olmadığına görə bununla bağlı məsələlərə aydınlıq gətirmirik. Bildirim ki, baş məşqçinin təqdimatı əsasında, rəhbərliyin qərarı ilə Xaqani bəylə yeni müqavilə bağlanmadı. Dediyiniz məsələ ilə bağlı əlavə informasiya verə bilməyəcəm”.
Bu ittihamla bağlı fikirlərini öyrənmək üçün Xaqani Məmmədova da müraciət etdik:
“Sizə bunu kim deyib? Hələ rəsmən ayrılmamışam. Bu barədə danışmaq, heç bir açıqlama vermək istəmirəm”.
Hadisələr hansı yöndə cərəyan edəcək? Məşqçini nə gözləyir? UEFA-nın oyunların toxunulmazlığı üzrə məsul nümayəndəsi Seymur Səlimlinin də fikirlərini öyrəndik:
“Bildiyiniz kimi, mən oyun toxunulmazlığı üzrə mütəxəssisəm. O cümlədən fərdlərin də toxunulmazlığı bizim üçün prioritetdi. O səbəbdən bu və başqa şəxslər haqqında Oyun Toxunulmazlığı Komissiyasının yekun rəyi və İntizam Komitəsinin qərarı olmadıqca hansısa fikir bildirmək tərəfimdən düzgün olmaz”.
RÖYANƏ OĞUZ
Digər xəbərlər
