Yay günəşli İtaliyada, adətən, ilin ən isti vaxtı sayılır. 2024-ün yayı isə A seriyası komandaları üçün ikiqat isti keçir.

"Football-plus.az" xəbər verir ki, söhbət baş məşqçilərlə bağlı verilən qərarlardan gedir. Eyni vaxtda bir neçə klubun çalışdırıcıları dəyişməsi praktikası əvvəllər bu ölkə üçün yad idi. Ancaq 2024-cü ilin yayında A seriyası ətrafında inanılmaz hadisələr baş verir. Konkret detallara toxunmağı vaxtıdı.
Liderləri götürsək, Çempionlar Liqasında mübarizə aparacaq beş klubdan yalnız ikisi – çempion “İnter”lə Avropa Liqasının son qalibi “Atalanta” baş məşqçisini saxlayıb. Simone İnzaqinin gələcəyi ilə bağlı onsuz da heç bir şübhə yox idi, ancaq Can Pyero Qasperini “Napoli”yə yollana bilərdi. Ancaq o, son nəticədə Berqamoda qalmağa qərar verdi və bursa 9-cu mövsümünə başlayacaq. Qoca Qasperini indiki A seriyasında ən uzun müddət davam edən mütəxəssisdi, bu göstəricidə ona yaxın düşən yoxdu.

Stefano Pioli 5 mövsüm çalışdı ki, bu da “Milan” üçün çox görünə bilər. A seriyasının son turunda “San-Siro”ya toplaşan publika onu göz yaşları ilə yola saldı, vakant postu isə uaxınlarda “Lill”i tərk edən Paulo Fonseka tutmağa hazırlaşır. Xulen Lopeteqi ilə Serjio Konseysaonun namizədliyi çox tez aradan qalxdı, qarşıdakı günlərdə artıq Fonsekanın təyinatı elan olunmalıdı.

Vaxtilə “Yuventus”un qalmaqalla göndərdiyi Massimiliano Alleqri Turinə ikinci gəlişində üç mövsüm vicdanla çalışdı. Onun yerini iki mövsümdən sonra “Bolonya”nı tərk edən Tyaqo Motta tutacaq. Öz növbəsində Bolonyaya Florensiyadan Vinçentso İtalyano yollacaq. O, son üç mövsümdə “Fiorentina” ilə keçirdiyi üç finalın hamısında uduzub – ikisini Konfrans Liqasında, birini isə İtaliya kubokunda.

Avropa Liqasıbda İtaliyanı “Roma” ilə “Latsio” təmsil edəcək. Mövsümün gedişində Joze Mourinyou əvəz edən Daniele De Rossi yeni mövsümdə də “canavarlar”ı uğura daşımağa çalışacaq. Mauritsio Sarrinin əvəzinə gələn İqor Tudor isə artıq Romanə tərk edib, yaxın günlərdə “Latsio”da onu kimin əvəz edəcəyi açıqlanacaq.

Konfrans Liqasında A seriyasını yenə “Fiorentina” təmsil edəcək. “Bənövşəyilər”in “sükanı arxasında” isə “Montsa”da özünü yaxşı göstərən Raffaele Palladino dayanacaq. Əlbəttə, bu yayın ən möhtəşəm hadisəsi Antonio Kontenin son mövsümdə fiasko ilə üzləşən “Napoli”yə gəlişidi. Ünlü mütəxəssis Neapol klubu ilə üçillik müqavilə bağlayıb. “Torino”dan İvan Yuriiç gedib, onun yerini “Venetsiya”nı yenicə A seriyasına çıxaran Paolo Vanolinin tutacağı gözlənilir.

Gördüyünüz kimi, A seriyasının turnir cədvəlində ilk 10 yerdə qərarlaşan klublardan yeddisi baş məşqçisini dəyişib. Elə ikinci “10-luğ”da da bu mənada maraqlı hadisələr yaşanıb. Veteran Klaudio Ranyeri “Kalyari”ni tərk etdi və klub karyerasını bitirdiyini bildirdi. “Montsa”nın “sükanı arxasına” əfsanəsi Alessandro Nesta keçib. O, ötən mövsüm B seriyasında mübarizə aparan “Recana”nı çalışdırırdı. Dünya çempionatının bir başqa qalibi, 2006-cı ildə “Qızıı top”u da qazanan Fabio Kannavaro isə “Udineze”də qalmadı. Fabio mövsümün sonuna bir neçə tur qalmış qəbul etdiyi komandanı A seriyasında saxlasa da, klubun sahibi onun xidmətindən imtina etməyə qərar verdi.

İyunun ilk dekadası dünən başa çatdı. Ancaq göründüyü kimi, A seriyasının transfer bazarında maraqlı hadisələrin sayı-hesabı yoxdu. Çox güman, irəlidə bizi bundan da maraqlı hadisələr gözləyir. Axı məşqçi transferləri, adətən, futbolçu transferləri ilə də müşayiət olunur.

A seriyasının top-10 klubunda məşqçi dəyişiklikləri
komanda 2023/24 mövsümü 2024/25 mövsümü
İnter Simone İnzaqi Simone İnzaqi**
Milan Stefano Pioli Paulu Fonseka*
Yuventus Massimiliano Alleqri Tyaqo Motta*
Atalanta Can Pyero Qasperini Can Pyero Qasperini**
Bolonya Tyaqo Motta Vinçentso İtalyano
Roma Daniele De Rossi Daniele De Rossi**
Latsio İqor Tudor Marko Baroni*
Fiorentina Vinçentso İtalyano Raffaele Palladino
Torino İvan Yuriç Paolo Vanoli*
Napoli Françesko Kaltsona Antonio Konte
* - təyinat hələ rəsmən açıqlanmayıb.
** - vəzifəsini qoruyub.