“Əsgər müəllim rəhbərliyi komandanı elitaya yüksəldə biləcəyinə inandırmışdı” - ŞOK AÇIQLAMA
1-ci liqada 2024/25 “futbol ili”nə hazırlıq görməli olan klublar sırasında “İmişli” də var.
Lakin Əsgər Abdullayevlə vidalaşan bölgə təmsilçisi hələ ki baş məşqçi və komanda ilə bağlı konkret addım atmayıb. Uğurlu mövsüm keçirsə də, son turlarda müəyyən səbəblərdən büdrəyən kollektivin yenidən çempionluq uğrunda mübarizə aparacağı bəllidi. Belədə bu məsələlərin nə vaxt həll olunacağı və başqa planlar haqda ətraflı bilgi almaq üçün klubun icraçı direktoru Aqşin Mürsəlova müraciət etdik. O, qəzetimizə açıqlamasında yubanmanın səbəblərini izah etdi:
“AFFA-nın 1-ci liqa klublarına nə qədər vəsait ayıracağını bilmək istəyirik. Bu bəlli olandan sonra ciddi işlərə başlayacağıq. Ötən il tələsdik və sonda uğursuzluğa düçar olduq. Hər şeyin planlı şəkildə olmasını istəyirik. Bilindiyi kimi, “Qaradağ Lökbatan” çempion ola bilərdi. Sonradan infrastrukturu istənilən səviyyədə olmadığından premyer-liqaya lisenziya ala bilmədi. Bu o deməkdi ki, qalib gəlsə belə, işə yaramayacaqdı. Bundan dərs çıxarmalıyıq. İnfrastruktur və nəticələrin qazanılmasıyla bağlı paralel iş aparmalıyıq. Təbii ki, öncəliyimiz stadionla bağlı olacaq. Növbəti mövsüm üçün maliyyənin həcmini biləndən sonra baş məşqçi ilə bağlı yekun qərar veriləcək. Heyət sonrakı mərhələdə formalaşdırılacaq”.
Klub rəsmisi İmişli şəhər stadionun ot örtüyünün dəyişdirilməsinin də görüləcək işlər sırasında olduğunu bildirdi:
“Stadionda iki meydança var. Məşq üçün süni qazonu olandan istifadə ediriksə, oyunlarımızı təbii ot örtüyündə keçiririk. Hazırda ikincisi baxımsızlıq üzündən yararsız hala düşüb. Sponsorumuzun (“RDC” MMC – red.) dəstəyi ilə təbii ot örtüyünü yenisiylə əvəzləyəcəyik. Artıq bir neçə şirkətlə danışıqlara başlamışıq. Gəlib torpaqdan nümunə götürəndən sonra müəyyən plan üzrə layihələr təqdim ediblər. Əvvəl bu işi həll etmək istəyirik. İyunun sonuna qədər baş məşqçi və komanda ilə bağlı işləri də yekunlaşdırıb tam hazır vəziyyətə gəlmək üçün digər çalışmalara başlayacağıq. Premyer-liqa üçün lisenziya almaq istəyiriksə, hansısa qüsur olmamalıdı. Bütün şərtləri yerinə yetirməklə ortaya yaxşı iş qoymaq istəyirik”.
Xatırlayırsızsa, “İmişli”nin sabiq baş məşqçisi Əsgər Abdullayevlə geniş müsahibədə bir çox mövzuya toxunmuşduq. Təcrübəli mütəxəssis “Futbol+”in ünvanladığı “bir neçə aydı mövsümün sonunda komandanı tərk edəcəyiniz deyilir. Son iddialara görə, "İmişli"nin premyer-liqaya yüksələ bilməməsi qərarınızı qətiləşdirib. Gerçəyi sizin dilinizdən eşitmək istərdim...” sualına onun cavabı belə olmuşdu:
“İndiyə qədər nə hardasa narazılıq etmişəm, nə də komandadan ayrılacağımı demişəm. Mətbuatın belə xəbəri hansı fakta əsasən yazdığını bilmirəm. Səhv başa düşülməsin, bu sözləri deməklə yerimi möhkəmləndirmirəm. Lakin reallıq budu. Hələ ki “İmişli”nin inkişafı üçün çalışırıq. Ayrılıb-ayrılmayacağımı zaman göstərəcək. Qismət olsa, yəni qalmağımı istəsələr, burda işləyəcəm. Məni tanıyan bilir ki, işə görə heç kimə ağız açmamışam. Təcrübəmə bələddilər”.
Bu məsələyə toxunmağımızın səbəbi var. Çünki mütəxəssis “İmişli”dən ayrılandan sonra verdiyi daha bir açıqlamada klub rəhbərliyi əməkdaşlığı davam etdirmək istəsə də, qalmasının düzgün olmadığını dilə gətirib. Göründüyü kimi, fikirlər bir-birini təkzib edir. Görəsən, məşqçinin fikrini dəyişməsinə səbəb olan amillər hansılardı? Qısası, sonradan nə baş verib? Aqşin bəy bu məqamı da dəqiqləşdirdi:
“Bəli, biz onunla əməkdaşlığa davam etməkdə maraqlıydıq. Özünə bu istəyimiz çatdırılsa da, getməyin daha doğru qərar olacağını bildirdi. Biz də təkid etmədik. Onunla söhbət zamanı bir çox mövzuya toxunduq və uğursuzluğun səbəblərini təhlil etdik. Bilindiyi kimi, İmişlidə əsasən isti hava şərait hökm sürür. Bu, Əsgər müəllimə yaxşı təsir etmirdi. Həmçinin çox yorulmuşdu. Həm klub ətrafında bəzi söz-söhbətlərin olması, həm də son turlarda yaşananlar mənfi ab-hava yaratmışdı. Biz hələ mövsümün əvvəlində bir neçə məşqçiylə danışıqdan sonra məhz onunla anlaşmışdıq. Çünki rəhbərliyi komandanı premyer-liqaya yüksəldə biləcəyinə inandırmışdı. Düzdü, alınmadı. Lakin səbəbsiz deyil. Əsgər müəllimin köməkçiləri də yox idi. Əlbəttə, Ruhid Usubov əlindən gələni edirdi. Lakin mövsümün gedişində Məqsəd Yaqubəliyevin “Şamaxı”ya yollanması işi daha da çətinləşdirdi. Bütün olanlara baxmayaraq, inanırdıq ki, o, növbəti mövsümdə daha yaxşı nəticələr qazana bilər”.
İcraçı direktor qarşıdan gələn “futbol ili”ndə “Qəbələ”nin 1-ci liqa üçün iddiası və AFFA tərəfindən “qırmızı-qaralar”a 700 min manat vəsait ayrılması mövzusunda bunları dedi:
“Geridə qoyduğumuz mövsümdə də “Şamaxı”nın çox iddialı olduğu deyilirdi. Düzdü, çempion oldular, lakin bunu asanlıqla edə bilmədilər. Komandaların ciddi təzyiqiylə üzləşməklə yanaşı, son tura qədər vuruşmalı oldular. “Qəbələ” də böyük klubdu. Amma bu, bizi çəkindirmir. Həmçinin 1-ci liqada köklü klubların sayı az deyil. Növbəti “futbol ili”ndə fərqli hadisələrin şahidi ola bilərik. Çünki komandalar daha güclü olmağa çalışacaq. Məncə, çempion olmaq istəyən yenə xeyli əziyyət çəkməli olacaq. Futbol indi elə səviyyədədi ki, büdcənin əhəmiyyəti azdı. “Neftçi”nin avrokuboklara yollana bilməməsi bunun bariz nümunəsidi. “Qəbələ”yə kömək edilməsinə gəlincə, təqdirəlayiq addımdı. Həmin akademiya ölkə futboluna çox bacarıqlı futbolçular bəxş edib və bu şərəfli işi görməyə davam edəcək”.
KƏNAN BAHADIR
Digər xəbərlər
