Məlum olduğu kimi, iyunun 2-də Azərbaycanda futbol mövsümü başa çatdı.

Ölkə kubokunu da qazanan “Qarabağ” növbəti “qızıl dubl” ilə futbol tariximizdə özünəməxsus yerini bir qədər də möhkəmlətdi. Bununla yanaşı, 2023/24 mövsümü bir neçə komandanın sıçrayışı ilə də əlamətdar oldu. Əlbəttə, söhbət ilk növbədə “Zirə”dən gedir.

Düzdü, “qartallar” mövsümün əvvəlində zirvəni ələ keçirdəndə onları çempion kimi görməyə başlayanların ümidləri doğrulmadı. “Zirə” kubokun finalında uduzduğu kimi, çempionatda da liderliyi “Qarabağ”a təhvil verməli oldu. Mövsümün gedişində zaman-zaman Rəşad Sadıqov da nişangaha çevrildi. Onun haqqında “oynatdığı müdafiə futbolundan başqa bir şey deyil” deyənlər az deyildi. Baş məşqçinin hakimlərə daimi etirazını “cığallıq” adlandıranlar da bir cəbhədə yığılmışdı. Təbii ki, gənc məşqçi yüz ölçdü, bir biçdi. Kiminsə nəsə deməsinə yox, nəticəyə kökləndi. Sonda da bacardı. Kubokun finalından sonra “qartallar”ın ehtiyat qapıçısı Anar Nəzirovla söhbətləşdik. 38 yaçlı futbolçu həm son oyun, həm də komandası ilə bağlı suallarımızı cavabladı.

- Komandan kubokun biraddımlığında dayandı. Səncə, uduzmağınız şanssızlıqla bağlıdı, yoxsa rəqibin təcrübəsi ilə?
- Əlbəttə, komanda olaraq, istərdik qalib gələk. Amma futboldu. Hər sey istədiyin kimi olmaya bilir. Nəticədən asılı olmayaraq, əzmkarlığa və apardığı mübarizəyə görə komandamıza böyük alqış düşür. Bundan sonra nəsə demək mənasızdı.

- Finala "Qarabağ" yox, başqa komanda ilə qarşılaşsaydız, necə olardı?
- Fərqi yoxdu, final yenə də finaldı. Təbii ki, "Qarabağ"ın adı ayrıca motivasiyadı. Final elədi ki, hər kəs yaxşı hazırlaşır, özünü ən yaxşı tərəfdən göstərmək istəyir. Əlinə düşən şansları boşa verməməyə çalışır. İtirilən hər dəqiqə ziyanına işləyə bilər. Ona görə də belə maraqlı alınır.

- "Zirə" özünəməxsus futbol nümayiş etdirdi?
- Oyunun axarına görə dəyişdi. Hesabda geri düşsək də, bərabərləşdirə bildik. Motivasiya öz sözünu dedi. Uduzmaq istəmirdik. Ona görə də komandada hər kəs var gücünü səfərbər etdi. Son illərdə bəlkə də "Qarabağ"a belə müqavimət gostərən ikinci komanda görməmişəm.

- Sırf finalı nəzərdə tutursan?
- Ümumiyyətlə. Komandamız "köhlən atlar"a qarşı özünəməxsus mübarizə apardı.

- Bu məğlubiyyət Avroliqada keçirəcəyiniz oyunlara hansısa şəkildə təsir edəcək?
- Məğlub olmağımıza baxmayaraq, gözəl oyun keçirdik. Məğlubiyyət Avroliqaya gözəl başlanğıc ola bilər. Daha da “artıra”, səhvlərimizin üstündə çalışa bilərik. Qazanılan təcrübədi. Biz də bunun üstündə dayanacağıq.

- Mövsümün əvvəlində heç kim sizin komandanın yüksək nəticə əldə edəcəyini düşünmürdü. Amma siz onları yanıltdız. Burdan elə düşünənlərə sözün?
- Çempionatın sonunda da, elə kubokda da yaxşı mübarizə apardıq. İkinci yeri tutaraq sübut etdik ki, "Zirə" təsadüfən ikinci yerə gəlməyib. Artıq ikinci dəfədi kubokun finalında oynayırıq. Biz sözümüzü biu cür dedik.

- Mövsümün əvvəlində hətta ilk pillədə qərarlaşmızdız. Çempionluqla bağlı planlar qururduz, yoxsa...
- İkinci yer də "Zirə" üçün maksimumdu. Amma builki vəziyətə görə belə oldu. Hər kəs istəyər ki, daha yüksək pillələr üçün mübarizə aparsın. Onu fikirləşməyənlərin, yəqin ki, problemi olar. Biz də, əlbəttə, növbəti mövsüm qarşıya daha böyük hədəflər qoyacağıq.

- Rəşad Sadıqov cari mövsüm sənə az şans verdi.
- Təbii ki, bir futbolçu olaraq, komandam üçün əlimdən gələni etməyə hazıram. Gələcəkdə daha yaxşı çalışmaq, etimadları dogrultmaq istəyirəm. Başqa heç nə.

- Baş məşqçi barədə nə deyə bilərsən?
- Öz oyun üslubu, özünəməxsus xarakteri olan məşqçidi. Oyunçularına elə motivasiya verir ki, yaxşı nəticə əldə etsin. Ədalətli qərar verir, sözün düzünu deyir.

- Azarkeşlər mövsümboyu sizi dəstəklədi. Kubok, çempionat matçları seçmədən stadiona gəlib dəstək verdilər. Avropa Liqasının oyunlarından öncə onlara nə demək istərdin?
- Bizi udanda da, uduzanda da dəstəkləyirlər. Sağ olsunlar ki, həmişə yanımızda olurlar. Əminəm ki, Avroliqa oyunlarında da möhtəşəm dəstəklərini əsigəməzlər.

RÖYANƏ OĞUZ