“Artıq burda çalışmağımın 4 ayı tamam oldu. Daha çox tanışlıq funksiyasını yerinə yetirən bu müddət ərzində bir sıra işlər də görüldü. Həm bu mövsümü qiymətləndirdik, həm də növbəti mövsümün planlarını cızmağa başladıq. Hansı pozitiv dəyişiklikləri edə biləcəyimizin üzərində fikirləşirik. İşçi heyəti, yəni istər məşqçi, istərsə də tibbi personal ilə bağlı çalışmalar edirik. Məşqçi heyətimizi daha da genişləndirmək və daha keyfiyyətli məşqçilərlə çalışmaq, eyni zamanda məşqçilərimizin biliklərini artırmaq üçün müəyyən planlarımız var. Bu mövsüm onlardan bir neçəsi UEFA-nın kateqoriya kurslarını oxudular. Növbəti mövsüm üçün daha fərqli addımlar atmağı planlaşdırırıq. Beynəlxalq təcrübəmizi artırmaq istəyirik. Bu həm də oyunçulara aiddi. Bu mövsüm “Qarabağ” akademiyasının komandaları 9 beynəlxalq səfərə çıxdı ki, yetərincə yaxşı rəqəmdi. Qış fasiləsindən sonra üç komandamız Belarusda keçirilən beynəlxalq turnirlərdə çıxış etdilər. Əlavə iki komandamızı Antaliyaya göndərdik ki, onlardan biri 9 yaşlılar idi. Bu yaşda futbolçuların ölkı xaricinə çıxması çox yaxşı təcrübədi. Digər komandamız U-14 idi. Hansı ki, Belarusda keçirilən turnirin qalibi oldu. Onların da təcrübələrini artırmalarını qarşımıza məqsəd qoymuşuq. Daha sonra iki yaş qrupumuzu da Qətərə, “Aspire” akademiyasına göndərdik. Orda akademiyanın komandalarıyla çox yaxşı, keyfiyyətli görüşlər keçirtdik. Çox xoş oldu. Həm oyunlar pozitiv oldu, həm də “Aspire” akademiyasının məşqçilər heyətiylə, akademiyanın texniki əlaqələndiricisi Eduorta Moureylə görüşümüz baş tutdu. Daha sonra fiziki hazırlıq performans şöbəsinin rəhbəriylə görüşümüz baş tutdu. Onlar öz təcrübələrini bizimlə bölüşdü. “Aspire” akademiyası şəraitinə görə çox güman, dünyanın ən yaxşı akademiyalarından biridi. Bundan sonra da onlarla işbirliyimiz, əməkdaşlığımız davam edəcək. Mənim onlarla tanışlığım, şəxsi münasibətlərim uzun illərə söykənir və bunu davam etdirəcəyik. Onu da qeyd edim ki, iyulun əvvəllərində daha bir turnir bizi gözləyir. 16 yaşlılarımızı Estoniyaya göndərəcəyik. “Tallin Cup” turnirində çıxış edəcəklər. Növbəti mövsüm isə beynəlxalq turnirlərin sayını daha da artıracağıq. Həmçinin ölkə daxilində keçirilən fərqli turnirlərdə iştirak etməyi müntəm hala çevirmək istəyirik. Ölkə daxilində keçirilən yarışlarla bağlı işlər daha çox ötən mövsüm olduğu kimi davam edəcək. Bizim “Sərhədçi” Olimpiya İdman Mərkəzindəki meydançamızın örtüyü yaxşı vəziyyətdə deyildi. Bu mövsüm həmin ot örtüyü də dəyişdirildi. Hazırda orda yardımçı otaqların təmirini də davam etdiririk. Həm məşqçilər üçün iş otağı, həm də tibbi heyət üçün müayinə-müalicə otaqları nəzərdə tutmuşuq. Bir sözlə, infrastrukturu əlimizdən gələn qədər yaxşılaşdırmağa çalışırıq. Qeyd etdiyim kimi, məşqçilərin inkişafı da ön plandadı. Onlar üçün də müəyyən layihələrimiz olacaq. Mən həm də Avropa Klublar Assosiasiyasının (ECA) akademiyalar üzrə işçi qrupunum üzvüyəm. Onlarla bağlı da müəyyən layihələr artıq var ki, təsdiqini tapıb. Sadəcə, həyata keçirilməsi növbəti mövsüm üçün nəzərdə tutulub və orda da “Qarabağ” olaraq aktiv iştirak etməyi planlaşdırırıq. Həmçinin əsas komandamızın UEFA Çempionlar Liqasının qrup mərhələsinə, daha doğrusu bu ildən liqa mərhələsi adlandırlacaq liqaya düşmək ehtimalı var. Belə olacağı halda avtomatik U-19 komandamız da həmin turnirdə iştirak edəcək. Biz də bunu nəzərə alaraq, həmin yaş qrupu üzrə komandamız üzərində daha çox dayanmağı, 2005, 2006, 2007 təvəllüdlü futbolçularımızı komanda şəklində hazırlamağı düşünürük”.

“Qəbələ” ilə bağlı təəssürat çox zəngindi. “Qəbələ” mənə doğmadı. Harada və necə olmağımdan asılı olmayaraq, daim maraq dairəmdə olacaq. İnanır və ümid edirəm ki, xeyirlisi bu imiş. Klub uzun illər yüksək büdcəylə həm ölkədaxili, həm də UEFA yarışlarında iştirak etdi. Ondan sonra büdcənin kəskin azalması işin ümumi axarına çox mənfi təsir etdi. Amma toplanmış təcrübə, resurslar imkan verdi ki, daha bir neçə il ayaqda qalmaq mümkün olsun. Nə vaxtsa bu enişin yaşanması ehtimalı var idi. Çox təəssüf edirəm ki, həmin eniş bu mövsümə təsadüf etdi. Ancaq həm də təmizlənmə, əksiklərin, çatışmazlıqların aradan qalxması və yenidən ayağa qalxmaq üçün bu bir çağırışdı. Növbəti mövsüm 1-ci liqada “Qəbələ”yə azarkeşlik edəcəyik. İnanıram ki, “Qəbələ” vaxtından əvvəl premyer-liqaya dönüşünü təsdiqləyəcək. Klubun rəhbərliyində olan şəxslər, təcrübə, ənənələr sözünü deyəcək ki, “Qəbələ” ayaqda qala bilsin, yenidən ölkə çempionatının elitasına qayıtsın”.