Futbol mövsümünün sonuncu matçında, yəni kubokun finalında premyer-liqanın ən güclüləri üz-üzə gəldi.

“Qarabağ” tarixində 6-cı dəfə “qızıl dubl” etmək arzusunu gizlətmirdisə, “Zirə” də ilk dəfə titul qazanmaq istəyirdi. Oyundan əvvəl çoxları “köhlən atlar”ın şanslarını yüksək qiymətləndirir, “qartallar”ın baxımlı oyun göstərəcəyinə şübhə ilə yanaşırdı. Rəşad Sadıqovun komandası bu baxımdan, demək olar ki, bütün futbol ictimaiyyətini yanıltdı. Təbii ki, bunu oyunun bütün dəqiqələrinə şamil etmək olmaz. Düzdü, qarşılaşma dinamik başladı, lakin çox keçmədən ənənəvi “Zirə” taktikası işə düşdü. Silva Andradenin zərbəsini dəf etdi. Ardından Zubir qeyri-dəqiqlik üzündən komandasını sevindirə bilmədi. Qəsəbə təmsilçisinin ilk qol şansı isə 21-ci dəqiqədə yarandı. Utziqin sol cinahdan göndərdiyi top Məqsədin yöndəmsiz müdaxiləsiylə “çərçivə”dən yan keçdi. Bundan sonra topa yalnız “Qarabağ” nəzarət edirdi. Anlaşılırdı ki, Sadıqovun planı da məhz bundan ibarətdi. Nominal meydan sahiblərinin 1-ci hissədə təhlükəli vəziyyət yaratmaqda çətinlik çəkdiyi görünürdü. Çünki rəqibi mərkəzdə qarşılayan, irəliləməsinə mane olan “qartallar” buna imkan vermirdi. Belədə birinci hissənin qolsuz başa çatacağını düşünməyə başlamışdıq. Lakin 42-ci dəqiqədə Nərimanın cərimə meydançasına göndərdiyi topu Juninyo tora qovuşdurdu.

İkinci yarı daha dinamik və baxımlı oyunla yadda qaldı. Juninyo ilə Elvinin qeyri-dəqiq zərbələrindən sonra sürəti artıran “Zirə” qısa zamanda hesaba tarazlıq gətirdi. 57-ci dəqiqədə İsmayıl Zeblinin ötürməsini “çərçivə”yə göndərdi. Lakin “qartallar”ın xoşbəxtlikdən “qanad çırpdığı” anların ömrü qısa oldu. Çünki Yankoviçin topu künc zərbəsindən oyuna daxil etdiyi epizod Zubirin başla zərbəsindən sonra qolla nəticələndi. Beləliklə, Rəşad Sadıqovun komandası üçün ölüm-dirim mübarizəsi başladı. Mütəxəssis əvəzetmələri sıraladı, komandasını hücuma səslədi. Buna baxmayaraq, “qartallar” heç cür hesabı bərabərləşdirə bilmədi. İnsafən, onların bunun üçün şansları da oldu. Daha dəqiqi, Rüstəmin ardıcıl üç zərbəsini gah müdafiəçilər, gah da Lunyov dəf etdi. Juninyo isə Elvinin qapı önünə göndərdiyi əla ötürməyə çata bilmədi, dubl imkanını əldən verdi. Matçın son dəqiqələri tərəflərin bir-birini izləyən hücumlarıyla müşayiət olundu. Bu ərəfədə “Zirə”dən Meza Kolli, Qismət və Ceyhun, “Qarabağ”dan Juninyo, Zubir və Toral hesabı dəyişə bilərdi ki, istəklərinə çatmadılar.
“Qarabağ” iki il əvvəl olduğu kimi, bu dəfə də kuboku “Zirə”yə vermədi. Hər halda, “Zirə” Rəşad Sadıqovun rəhbərliyi altında tarixinin ən uğurlu mövsümünü arxada qoydu. “Qarabağ” 6-cı “qızıl dubl”a imza atdısa, “qartallar” premyer-liqada 2-ci, kubokda finalçı oldu.

KƏNAN BAHADIR