Portuqaliya yığmasının rəhbərliyi Kriştiano Ronaldoya bir qədər istirahət verməyi lazım bilib.

“Football-plus.az” xəbər verir ki, ulduz futbolçu Avropa çempionatı ərəfəsində komandasının ilk yoldaşlıq oyununu buraxacaq.

Bu barədə “O Jogo” məlumat yayıb. “Əl-Nəssr”də çıxış edən Ronaldo nəhəng turnirə hazırlıq çərçivəsində Finlandiya ilə bu gün keçiriləcək matçda iştirak etməyəcək. Ona Səudiyyə Ərəbistanı çempionatı başa çatandan sonra milli komandanın məşqçilər korpusundan birhəftəlik məzuniyyət hüququ verilib. Eyni səbəbdən “Əl-Hilal”ın yarımmüdafiəçisi Ruben Neveş də Finlandiya ilə matçı buraxacaq. Hər iki futbolçu gələn həftəsonu milli komandaya qoşulacaq.

Xatırladaq ki, Portuqaliya AÇ-2024-ün final turnirindən əvvəl Xorvatiya (8 iyun) və İrlandiya ilə (11 iyun) də qarşılaşacaq. Qitə çempionatı iyunun 14-dən iyulun 14-dək Almaniyada keçiriləcək. Portuqaliyanın qrup mərhələsindəki rəqibləri Çexiya, Gürcüstan və Türkiyədi.