Dekabrın 2-də Avropa futbol ictiamiyyətinin diqqəti Almaniyanın Hamburq şəhərindəki tədbirə yönəlmişdi. Möhtəşəm mərasimdə AÇ-2024-ün final mərhələsinin püşkü atıldı.

"Football-plus.az" xəbər verir ki, Bakı vaxtı ilə saat 21.00-da başlayan püşkatmada qitə çempionatında iştirak hüququ qazanan 21 milli komandanın qrup mərhələsindəki rəqibləri məlum oldu. Son 3 vəsiqənin sahibi isə gələn ilin martına təyin olunan pley-off mərhələsinin oyunlarından sonra müəyyənləşəcək. Hər püşkatmadan əvvəl olduğu kimi, bu dəfə də iştirakçılar AÇ-2024-ün seçmə turnirindəki göstəricilərinə əsasən 4 səbətə ayrılmışdılar. Qeyd edək ki, pley-offda A, B və C yolu ilə qalib adını qazanacaq yığmalar 4-cü səbətə salınmışdı. Səbətlərin tərkibi aşağıdakı kimi idi:

1-ci səbət: Almaniya, Portuqaliya, Fransa, İspaniya, Belçika, İngiltərə.
2-ci səbət: Macarıstan, Türkiyə, Rumıniya, Danimarka, Albaniya, Avstriya.
3-cü səbət: Niderland, Şotlandiya, Xorvatiya, Sloveniya, Slovakiya, Çexiya.
4-cü səbət: İtaliya, Serbiya, İsveçrə, A yolunda pley-offun qalibi (Polşa, Estoniya, Uels, Finlandiya), B yolunda pley-offun qalibi (İsrail, İslandiya, Bosniya və Hersoqovina, Ukrayna), C yolunda pley-offun qalibi (Gürcüstan, Lüksemburq, Yunanıstan, Qazaxıstan).
17-ci Avropa çempionatı gələn il 14 iyun - 14 iyul aralığında Almaniyanın 10 şəhərində təşkil olunacaq. Püşkatmanın nəticələri:
A qrupu: Almaniya, Şotlandiya, Macarıstan, İsveçrə.
B qrupu: İspaniya, Xorvatiya, İtaliya, Albaniya.
C qrupu: Sloveniya, Danimarka, Serbiya, İngiltərə.
D qrupu: Fransa, Avstriya, Niderland, A yolunda pley-offun qalibi (Polşa, Estoniya, Uels, Finlandiya).
E qrupu: Belçika, Rumıniya, Slovakiya, B yolunda pley-offun qalibi (İsrail, İslandiya, Bosniya və Hersoqovina, Ukrayna).
F qrupu: Portuqaliya, Türkiyə, Çexiya, C yolunda pley-offun qalibi (Gürcüstan, Lüksemburq, Yunanıstan, Qazaxıstan).

İspaniya ilə İtaliyanın eyni qrupa düşməsi maraqlıdı. Xatırladaq ki, bu komandalar AÇ-2020-nin yarımfinalında qarşılaşmış, əsas və əlavə vaxtı 1:1 hesabı ilə nəticələnən matçdan sonra qaçılmaz olan penalti seriyası italyanların qələbəsi (4:2) ilə başa çatmışdı. Maraqlıdı ki, pandemiya səbəbindən 2021-ci ilin yayında baş tutan sonuncu qitə birinciliyinin digər yarımfinal matçında qarşılaşan Danimarka və İngiltərə də eyni qrupda yarışacaq. Deməli, ingilislərə 1:2 hesabıyla uduzan Danimarka və İspaniya tanış rəqiblərindən qisas almağa çalışacaq. Türkiyə və Portuqaliyanın qitə çempionatlarında 4-cü dəfə qarşılaşacağını da bildirək. AÇ-2024-ün açılış matçı iyunun 14-də Münhendə Almaniya və Şotlandiya yığmaları arasında, final oyunu isə iyulun 14-də Berlində keçiriləcək. Qrup mərhələsinin təqvimini nəzərinizə çatdırırıq.
14 iyun
Almaniya - Şotlandiya (Münhen)
15 iyun
Macarıstan - İsveçrə (Köln)
İspaniya - Xorvatiya (Berlin)
İtaliya - Albaniya (Dortmund)
16 iyun
Sloveniya - Danimarka (Ştutqart)
Serbiya - İngiltərə (Helzenkirhen)
A yolunun qalibi - Niderland (Hamburq)
17 iyun
Avstriya - Fransa (Düsseldorf)
Belçika - Slovakiya (Frankfurt)
Rumıniya - B yolunun qalibi (Münhen)
18 iyun
Türkiyə – C yolunun qalibi (Dortmund)
Portuqaliya – Çexiya (Leyptsiq)
19 iyun
Şotlandiya - İsveçrə (Köln)
Almaniya - Macarıstan (Ştutqart)
Xorvatiya - Albaniya (Hamburq)
20 iyun
İspaniya - İtaliya (Helzenkirhen)
Danimarka - İngiltərə (Frankfurt)
Sloveniya - Serbiya (Münhen)
21 iyun
A yolunun qalibi - Avstriya (Berlin)
Niderland - Fransa (Leyptsiq)
Slovakiya - B yolunun qalibi (Düsseldorf)
22 iyun
Belçika - Rumıniya (Köln)
Türkiyə - Portuqaliya (Dortmund)
C yolunun qalibi - Çexiya (Hamburq)
23 iyun
İsveçrə - Almaniya (Frankfurt)
Şotlandiya - Macarıstan (Ştutqart)
24 iyun
Albaniya - İspaniya (Düsseldorf)
Xorvatiya - İtaliya (Leyptsiq)
İngiltərə - Sloveniya (Köln)
Danimarka - Serbiya (Münhen)
25 iyun
Fransa – A yolunun qalibi (Dortmund)
Niderland – Avstriya (Berlin)
26 iyun
B yolunun qalibi - Belçika (Ştutqart)
Slovakiya - Rumıniya (Frankfurt)
Çexiya - Türkiyə (Hamburq)
C yolunun qalibi – Portuqaliya

Reaksiyalar
Yulian Naqelsmann, Almaniya yığmasının baş məşqçisi: “Komandamız “ölüm qrupu”na düşməyib, amma heyət çox maraqlıdı. Bu qrupda zəif rəqib yoxdu. İndidən çox da danışmaq istəmirik, sözümüzü meydanda demək istəyirik”.
Vinçentso Montella, Türkiyə yığmasının baş məşqçisi: “Püşklə bağlı xüsusi istəklərimiz yox idi. Bundan sonra görəcəyimiz iş rəqiblərimizi ətraflı şəkildə öyrənmək olacaq. Portuqaliya və Çexiya ilə düşməyimiz bizə AÇ-2008-i xatırlada bilər. Ancaq ümidlər və çox şey fərqli ola bilər. Türkiyə AÇ-2008-in püşkatma mərasiminə 4-cü səbətdən daxil olmuşdu. Bu dəfə gözlənilməz hadisələr ola bilər”.
Zlatko Daliç, Xorvatiya yığmasının baş məşqçisi: “Təbii ki, turnirin ən çətin qrupuna düşmüşük. Məqsədimizin nə olduğunu bilirik. Qrupdan çıxmaq istəyirik və mən nikbinəm. Ötən dəfə çempion olmuş İtaliya və Millətlər Liqasının son qalibi İspaniya ilə qarşılaşacağıq. Beləliklə, bəlkə də qrupda İtaliyaya qarşı son oyunumuz həlledici olacaq. Hazırlaşmaq üçün altı ayımız var. Ən əsası Luka Modriç, İvan Perişiç və Marselo Brozoviç kimi futbolçuların turnirdə yaxşı formada olmasıdı”