“ÇL-i qazanmaq üçün hələ çox fürsətim olacaq” - Mbappe Madriddə özünə ev aldı
Dünya futbolunun ən çox müzakirə edilən isimlərindən olan Kilian Mbappe ilə bağlı yeni xəbərlər var.
“Football-plus.az” xəbər verir ki, Hər ötən gün onu bir qədər də “Real”a yaxınlaşdırır. İnsayder Fabrisio Romanonun xəbərinə görə, Madrid nəhəngi bu transferi qarşıdakı iki həftə ərzində, yəni AÇ-2024-ün startına qədər rəsmən açıqlayacaq. Mbappenin artıq Madriddə özünə ev aldığı da məlum olub. O, Qaret Beylə məxsus malikanəyə görə 11 milyon avrosundan keçib. “Ok Diario”nun iddiasına görə danışıqlar heç də asan keçməyib. Beyl mülkə görə 13 milyon avro tələb edirdi. Amma sonradan Mbappenin təklifi ilə razılaşmalı oldu. Ev hələ 2022-nin iyunundan – Beyl Madridi tərk etdiyi vaxtdan satışa çıxarılmışdı. 8 yataq otağı və həyətində qolf meydançası da olan ev Madridin ən bahalı rayonlarından sayılan La Finkada yerləşir. Maraqlıdı ki, bir həftə öncə İspaniya mətbuatı iddia etmişdi ki, Mbappe La Moralexa rayonunda yerləşən 18 milyon avroluq bir malikanə satın alıb. Həmin evin qoşuluğunda Serxio Ramosla ünlü amerikalı aktyor Riçard Girin yaşadığı iddia edilmişdi.
Mbappe ilə bağlı digər xəbər odu ki, o, “Globe Soccer Awards”ın sorğusunda qalib gələrək Avropanın ən yaxşı futbolçusu seçilib. Geridə qoyduğumuz mövsüm 48 rəsmi oyunda 44 qol, 10 məhsuldar ötürməlik mükəmməl performans ortaya qoyan Kilian Bellingem, Vinisius, Holann və Keyni qabaqlayaraq bu mükafata sahib çıxıb. O, mükafatın təqdimat mərasimində uşaq vaxtı “Milan” azarkeşi olduğunu etiraf etməklə çoxlarını təəccübləndirib. Çünki Mbappenin uşaq vaxtı Kriştiano Ronaldonun böyük pərəstişkarı olduğu bilinirdi. Bu üzdən onun “Real”a simpatiya bəslədiyi güman edilirdi. Sən demə, heç də belə deyilmiş:
“Uşaq vaxtı ”Milan”ın böyük azarkeşi idim. İndiyə qədər də onların A seriyasında hər tur oyunlarını izləməyə çalışıram. Tək mən yox, bizim bütün ailəmiz “Milan” azarkeşidi. Həmişə demişəm ki, bir gün İtaliyada oynasam, mütləq “Milan”ın şərəfini qoruyacam”.
Artıq Fransa yığmasının düşərgəsində olan və qarşıdan gələn qitə turnirinə hazırlaşan Mbappe dünən fransalı həmkarlarımıza da açıqlamalar verib. O, 2022-ci ildə “Real”a keçməyərək son anda PSJ-də qalmasından, eləcə də Çempionlar Liqasının finalında Madrid nəhənginə azarkeşlik edib-etməyəcəyindən danışıb:
“2 il öncə qərar verərkən bütün nüansları, eləcə də DÇ-2022-ni nəzərə almalıydım. Çox vacib və çətin qərar oldu. Peşəkar futbolçu karyerası ərzində bir neçə dəfə çətin qərarlar vermək məcburiyyətində qalır. Həmin vaxt yaşadıqlarımı heç kimə arzulamıram. Amma qərarıma görə peşman deyiləm. Ən azı PSJ tarixinin ən məhsuldar futbolçusuna çevrildim. ÇL-in finalında heç kimə azarkeşlik etməyəcəm. Mən də sizlər kimi sadəcə, oyuna baxacam. Futbolu sevən şəxs hər oyuna baxmağa çalışır. Mən “böyük beşliy”in çempionat oyunlarını, eləcə də ÇL matçlarını böyük məmnuniyyətlə izləyirəm. ÇL-i qazanmaq üçün hələ çox fürsətim olacaq. Qismətim məhz belə yazılıb. Bir neçə dəfə bu turniri qazanmağa yaxın olmuşdum. Amma belə şeylər futbolun bir parçasıdı”.
Digər xəbərlər
