Konfrans Liqasının final oyununun nəticəsi rəqib komandaların düşərgəsində fərqli qarşılanıb.

Bu isə təbiidi: axı “Olimpiakos” qalib, “Fiorentina” isə məğlub olub. Florensiya klubunun oyunçuları matçdan sonra “Ayya Sofiya” stadionundakı italiyalı azarkeşlərin olduğu tribunalara yaxınlaşarkən göz yaşlarını saxlaya bilməyiblər. “Fiorentina” tifozisi komandanın bu turnirdə ardıcıl ikinci dəfə finalda uduzmasını qəzəblə qarşılayıb. Oyunçulara “bizim futbolkaya hörmət edin!” sözlərini qışqıran fanatlar oturacaqları sındıraraq meydana atıblar.

Əks cəbhədə isə böyük şadyanalıq olub. Hakimin final fitindən sonra “Olimpiakos”un Pireydəki azarkeşləri qitə arenasında ilk qələbəni bayram etməyə başlayıblar. Yerli mənbələrin məlumatına görə, şəhərin küçə və meydanlarındakı aksiyalarda təxminən 150 min nəfər futbolsevər iştirak edib.

Onlar sevinclərini müxtəlif atəşfəşanlıq elementlərindən istifadə etməklə bölüşüblər. Gecə saatlarında Afinadan Pireyə qayıdan komandanın üzvləri isə ilk növbədə Pireyin meri ilə görüşüb və sonra üstüaçıq avtobusla şəhərin küçələrində azarkeşlərlə birgə qələbə paradı təşkil ediblər.