Yığmanın yoldaşlıq oyunları üçün hədəfi dəqiqləşməyib - AÇIQLAMA
Bilindiyi kimi, ölkəmizin futbol yığması iyunun 7-də Albaniya, 11-də Qazaxıstan ilə yoldaşlıq oyunu keçirəcək.
Mayın 30-da toplanışa başlayan komanda srağagün dincəldi. Artıq dünən tam heyətlə toplanış bərpa olunmalıydı. Təbii ki, bunun üçün “Qarabağ”la “Zirə”nin oyunçularının, eləcə də Anton Krivotsyuk, Musa Qurbanlı və Emil Mustafayevin komandaya qatılması vacibdi.
Görəsən, onlar gəlib çıxdımı? Kollektivin ümumi durumu necədi? Dünən bu suallarla baş məşqçinin səlahiyyətlərini yerinə yetirən Arif Əsədova müraciət etdik. O, qəzetimizə açıqlamasında Musadan başqa hər kəsin komandayla birgə olduğunu dedi:
“Bəli, artıq hər kəs bizlə bərabərdi. Qurbanlı da bu axşam komandaya qoşulacaq. Zədədən qayıdan oyunçuların da durumu qənaətbəxşdi. Kubok matçından sonra gələn futbolçular da formadadı. Bu gün həmin oyunçuları iki qrupa bölərək məşq etdik. Düzdü, oyunboyu meydanda olanlar da yaxşı vəziyyətdədi. Lakin yenə də işə məsuliyyətli yanaşdıq”.
Arif bəy yoldaşlıq oyunları üçün qarşıya qoyulan hədəfləri də bizlə bölüşdü:
“Əlbəttə, hər oyuna qələbə üçün çıxırıq. Amma bəzi taktiki gedişlər və bir neçə futbolçunu sınamaq üçün də çalışacağıq. Hələ ki konkret nəsə deyə bilmərəm. Məqşlər davam edir. Hadisələrin axarına əsasən qərarımızı qətiləşdirəcəyik”.
Yeri gəlmişkən, Qazaxıstan millisinin yeni baş məşqçisi bəlli olub. Bu posta rusiyalı mütəxəssis Stanislav Çerçesov təyinat alıb. O, bir neçə gün öncə istefa verən Məhəmməd Adiyevi əvəzləyib.
KƏNAN BAHADIR
Digər xəbərlər
