Bilindiyi kimi, ölkəmizin futbol yığmasının baş məşqçisiz günləri davam edir.

Nə hikmətdisə, AFFA noyabrın 22-dən bəri ötən müddətdə tələblərinə uyğun mütəxəssis tapmaqda çətinlik çəkir. Sanki baxtilə “özüm istefa verməyəcəyəm, burdayam, işimi davam etdirirəm, məni ancaq qovsalar, gedəcəyəm” deyən, sonradan arxasına belə baxmadan vətəninə yollanan italiyalı Canni de Byazi bu vəzifəyə qıfıl vurub. Növbəti ehtimallar isə ya təklif göndərilən mütəxəssislərin bundan imtina etməsidi, ya da bəzi iddiaların reallığı əks etdirməsi. O iddialar ki, guya AFFA-nın rəhbərliyi ciddi fikir ayrılığı yaşadığından eyni seçim ətrafında qərar verməkdə çətinlik çəkir. Hər halda, qurumun soyuq divarları arasında nələrin yaşandığı Allah bilir. Əsas odu ki, millimizin müvəqqəti rəhbəri Arif Əsədov işinin başındadı və artıq təlim-məşq toplanışına hansı futbolçuların dəvət edildiyini bilirik. Əvvəl xatırladaq ki, yığmamız iyunun 7-si Bakı vaxtıyla saat 21.00-da Albaniya, 11-i saat 18.00-da isə Qazaxıstanla yoldaşlıq görüşündə qarşılaşacaq. Hər iki oyun Macarıstanın Sombatxey şəhərindəki “Haladas SportKomplexum”da keçiriləcək. Təkrarçılıq olsa da, özünü göstərməsi üçün şans verilənləri də yada salaq: Şahruddin Məhəmmədəliyev, Rəşad Əzizli, Emil Səfərov, Rza Cəfərov, Emin Mahmudov, Mehdi Cənnətov, Elvin Bədəlov, Elvin Cəfərquliyev, Bədavi Hüseynov, Bəhlul Mustafazadə, Toral Bayramov, Aleksey İsayev, Ceyhun Nuriyev, Qismət Alıyev, Amin Seydiyev, Elvin Camalov, Rahil Məmmədov, Anton Krivotsyuk, Coşqun Diniyev, Vüsal İsgəndərli, Emil Mustafayev, Mahir Emreli, Musa Qurbanlı, Ramil Şeydayev.

İndi ümumi heyətlə bağlı müəyyən dəyişikliklərə toxunmaq zamanıdı. 2023/24 “futbol ili” həm ölkə daxilində, həm də xarici klublarda çıxış edən futbolçular üçün yetərincə gərgin keçdiyindən məhz “FİFA-series Edition 2024” turnirində iştirak üçün çağırılan oyunçularımıza diqqət yetirməliyik. Həmin yarış çərçivəsində dəvət edilən, lakin indi “yada düşməyənlər” bunlardı: Səlahət Ağayev, Eddi İsrafilov, Filip Ozobiç, Ozancan Kökçü, Renat Dadaşov, Bəxtiyar Həsənalızadə, Murad Xaçayev, Rövlan Muradov, Orxan Əliyev, Rüfət Abdullazadə.

Həmin vaxt çağrılmayan, indi diqqət mərkəzində olan futbolçular isə Mehdi Cənnətovla Elvin Bədəlovdu.
Əlbəttə, heyətlə bağlı yeniliklər gözlənilən idi. Arif Əsədovun sözlərinə görə, Renat, Eddi və Ozobiç zədəli olduğu üçün kənarda qalıb. Muradın çağrılmamasının səbəbi isə Elvin Bədəlovun seçilməsidi. Ozancan isə Vüsalın sınanılması üçün dəvət almayıb. Bununla yanaşı, Orxan və Rüfətin son həftələrdə effektiv çıxış etmədiyi bəllidi. Bəs Səlahət? Axı 33 yaşlı qolkiper Rəşaddan geri qalmır! Muradın “hesabdan silindiyini” anlayışla qarşılamaq mümkündüsə, Rövlanın uğurlu mövsüm keçirdiyinə şübhə yoxdu. Bəs Bəxtiyar Həsənalızadə hardadı? Deyəsən, Sərtan Taşkın da yavaş-yavaş “qan itirir”. Hələ Namik Ələskərovu demirik. O, nəinki qarşıdakı, sonuncu təlim-məşq toplanışında da zədə üzündən bəxtsizlik yaşamışdı.

Yuxarıda diqqətçəkən məqamlarla tanış olduq. Bu barədə daha ətraflı məlumat almaq məqsədilə Arif bəylə əlaqə saxlasaq da, o, suallarımıza qısa cavab verdi: “Hər mövqeyə iki oyunçu çağrıldığından, bu dəfə başqalarına şans verməyi lazım bildik. Başqa səbəb yoxdu”.
Maraq üçün qeyd edək ki, Yusif İmanov, Cəlal Hüseynov və Nəriman Axundzadə iyunun 7-də Slovakiya ilə səfərdə keçiriləcək yoldaşlıq görüşündə 21 yaşadək futbolçulardan ibarət millimizin heyətində olacaq. Ehtiyac yaransa, Slovakiyayla qarşılaşmadan sonra əsas yığmaya cəlb ediləcəklər.

Beləliklə, futbolçularımız bugündən iyunun 1-nə kimi toplanışa qatılacaq. 2-si istirahət günü olacaq. Yığma 3-dən etibarən tam heyətlə təlim-məşq toplanışına başlayacaq. Ölkə kubokunun finalında oynayacaq “Qarabağ” və “Zirə”nin oyunçuları, eləcə də Krivotsyuk və Musa iyunun 3-də kollektivə qoşulacaq. Emil Bakıya tez gəlsə, bugündən məşqlərdə iştirak edəcək. Coşqun və Vüsal bir neçə gündü burdadı. Onlar məşqçilərin verdiyi əlavə məşq proqramı əsasında hazırlaşır.

KƏNAN BAHADIR