“Avropada çıxış edəcək hər bir komandamıza uğurlar arzulayıram. Onlar ölkə çempionatında özlərini yaxşı tərəfdən göstərdi. Arzumuz odu ki, Avropada da uğurla çıxış edib, Azərbaycanın adını layiqincə təmsil etsinlər. “Qarabağ”dan isə gözləntim daha yüksəkdi. İnşallah, ən azı Çempionlar Liqasının qrupuna düşməyi bacaracaqlar. Qalan komandalarımıza gəlincə, fikrimcə, onların taleyi püşkatmadan sonra bəlli olacaq. Çünki qarşılaşacaqları rəqiblər kimliyi burda böyük əhəmiyyət daşıyır. Bu üzdən indidən “Zirə”, “Sabah” və “Sumqayıt”ın Avropadakı gələcək perspektivi haqda söz söyləməkdə çətinlik çəkirəm. Ümid edirəm ki, püşkatmadan sonra da təmsilçilərimizə münasib rəqiblər düşər, onlar da özlərini müsbət tərəfdən göstərərlər. O ki qaldı mənim proqnozuma, doğrudu, əvvəlcədən demişdim ki, “Neftçi” 100 faiz avrokuboklara vəsiqə qazanacaq. Əfsuslar olsun ki, komanda fiaskoya uğradı və 5-ci pilləni tutdu. Doğrusu, belə nəticəyə görə həddən artıq məyus oldum. Bilindiyi kimi, “Neftçi” bir flaqmandı, köklü komandadı. Düşünürəm ki, orda oynayan futbolçulardan tutmuş baş məşqçiyə kimi hər kəs məsuliyyətini dərk etməliydi. Çünki onlar Azərbaycanın ən köklü futbol komandasında işləyirdilər. Hesab edirəm ki, onlar bunu dərk etmədilər və hər dəfə meydana çıxanda baş məşqçidən tutmuş futbolçuya qədər heç kim can qoymadı. Təbii ki, bəzi futbolçular burda istisnadı. Amma əksəriyyəti sanki meydana mübarizə aparmaq yox, gəzmək üçün çıxırdı. Bu üzdən də komanda mövsümü 5-ci sırada bitirdi. Ondan əlavə də mövsüm ərzində də “Neftçi” kimi komandada iki baş məşqçi dəyişikliyi oldu. Adrian Mutuyla başladılar, sonra da Miodraq Bojoviçlə davam etdilər. Bu dəyişikiliklər də öz növbəsində komandaya pis təsir etdi. Heç bir çalışdırıcının nəticəsi olmadı. Mutu yaxşı futbolçu karyerasına malik olsa da, məşqçi kimi bunu bacarmadı. Bojoviç isə məşqçi kimi 18 il ərzində 21 komanda dəyişmişdi. Yəni o da nəticəsi olmayan bir məşqçi idi. Belə səbəblər üzündən komanda 5-ci yeri tutaraq, fiaskoya uğradı. Əlbəttə, üzücü durumdu. Bundan başqa, komandaya cəlb olunan futbolçu seçimlərində ciddi səhvlər olduğunu düşünürəm. Bəlkə də belə səhvlər olmasaydı, komanda çempionluq uğrunda mübarizə aparardı. Buna baxmayaraq, hesab edirəm ki, “Neftçi”ni düzəltmək mümkündü. Bilindiyi kimi, klub rəhbərliyi komanda üçün lazım olan bütün tələbləri yerinə yetirmişdi. Tələblərdən biri də belə idi ki, baş məşqçi hansısa futbolçunu heyətə cəlb etməkdə maraqlıdırsa, rəhbərlik də bu istiqamətdə ona kömək göstərsin. Çox təəssüf ki, nə baş məşqçi seçimləri, nə də onların komandaya cəlb etdiyi futbolçular uğurlu oldu. Komandaya gələcəkdə uğurlar arzulayıram. Əlbəttə, könlümdən keçən həmişə bu olub ki, “Neftçi” çempionluq üçün mübarizə aparsın və çempion olsun. İnşallah, növbəti mövsümdən “ağ-qaralar” düzələcək, çempionluq üçün yarışacaq və çempion da olacaq. İnamımız nə qədər yüksək olsa da, bunun reallaşıb-reallaşmayacağını zaman göstərəcək. Həmçinin bundan sonra baş məşqçi postuna kimi təyin edəcəkləriylə bağlı da məlumatımız yoxdu. Son günlərdə oxudum ki, komandaya yeni futbolçu cəlb ediblər. Bunun düzgün addım olmadığını düşünürəm. Komandada baş məşqçi olmaya-olmaya, belə addım atmaq yanlışdı. Hesab edirəm ki, heyətə cəlb edilməsi lazım olan futbolçuları yeni baş məşqçi seçməlidi. Belə hallar da öz növbəsində komandaya təsir edir və gələcək çıxışında büruzə verir”.