Kubokun finalındakı qələbə onun qalmaq şansını artırıb.

“Independent” nəşrində Erik ten Haqın “Old Trafford”dakı gələcəyi ilə bağlı geniş yazı dərc olunub. Həmin yazının məzmununu qısaca belə ümumiləşdirmək olar:
1. “Yunayted”in yeni rəhbərliyində niderlandlını fəal şəkildə dəstəkləyən adamlar var. Baş məşqçinin gələcəyi ilə bağlı qərar klub strukturları üçün ilk ciddi sınaqdı.
2. Erik ten Haqın gələcəyi həqiqətən də böyük sual altındadı, ancaq İngiltərə kubokunun finalında “Mançester Siti” üzərindəki qələbə onun mövqeyini xeyli gücləndirib.
3. MY-nin təmsilçiləri bu müddətdə Tomas Frank, Maurisio Poçettino, Tomas Tuxel və Kiran Makkennanın nümayəndələri ilə görüşüb.
4. Makkennaya hər nə qədər heyranlıq duyulsa da, klubda belə hesab edirlər ki, belə böyük kluba rəhbərlik etmək hələ onun üçün çox tezdi. Makkenna “İpsviç”i tərk etməyə qərar verərsə, böyük ehtimalla “Brayton”un “sükanı arxasına” keçəcək. “Yunayted”in bossları arasında Poçettino ilə Tuxelə bel bağlayanlar daha çoxdu.
5. Klubun sahibi olan INEOS şirkətinə rəhbərlik edənlər anlayırlar ki, Ten Haqın qovulması bu gün fanat hərəkətı üçün qeyri-populyar qərar olacaq. Xüsusən də MS üzərindəki qələbədən sonra. Bununla belə, klubda emosiyalardan kənar, obyektiv qərar qəbul etmək istəyirlər (məsələnin təkcə futbol aspekti müzakirə olunmayacaq).
6. Klubda niderlandlının bu mövsümünü Mikel Artetanın “Arsenal”dakı ilk tam mövsümü ilə müqayisə edirlər. Həmin vaxt “topçular” da klubdakı çoxlu dəyişiklik fonunda 8-ci yeri tutmuşdu.
7. Klub rəhbərliyinin mövsümöncəsi hazırlıq və zədəlilərin sayı ilə bağlı da sualları var. Üstəlik transferlərin nə dərəcədə effektli olması qorxudur. Hələlik məlum olan yalnız budu: INEOS yekun qərarını verməyib. Üstəlik rəhbərlik indi Den Eşvortla bağlı məsələnin necə həll olunacağını gözləyir. “Nyukasl”ın idman direktorunun MY-yə gəlişi gözlənilir.

Məşhur insayder Fabritsio Romano da MY ilə bağlı xəbərlər yayıb. Onun yazdığına görə, klub rəhbərliyi tezliklə 2023/24 mövsümünün nəticələrini təhlil etmək üçün bir araya gələcək. Gündəlikdə üç əsas məsələ olacaq. İlk növbədə komandanın ötən mövsüm üzləşdiyi zədə epidemiyası müzakirəyə çıxarılacaq. MY-də 50-dən artıq zədə və xəstəlik halı yaşanıb ki, bu məqam klubun tibb personalının fəaliyyəti ilə bağlı suallar doğurub. Bundan başqa, rəhbərlik yay “transfer pəncərəsi” dövründə işə yanaşmanın necə olacağını aydınlaşdıracaq. Çox güman, məhz bu iclasda mövqelərin gücləndirilməsi və oyunçu seçimi ilə bağlı planlar dəqiqləşdiriləcək. Və ən nəhayət: gözlənilən iclasda Ten Haqın gələcəyi ilə bağlı qərar veriləcək. Klub hələ də onun növbəti mövsüm qalacağı və ya başqa kimləsə əvəz olunub-olunmayacağı ilə bağlı mövqeyini müəyyənləşdirməyib.

Onu da xatırladaq ki, niderlandlı mütəxəssis kubokun finalındakı qələbədən sonra gələcəyi ilə bağlı heç nə bilmədiyini və onu “Old Trafford”da görmək istəmirlərsə, başqa yerdə mükafatlar qazanmağa köklənəcəyini demişdi.