"Yarışa qısa zamanda hazırlaşsaq da, buna baxmayaraq, uğurlu start verdik. Sonrakı matçlarda oyunumuz istədiyimiz kimi alınmadı. Düşünürəm ki, daha yaxşı oynaya bilərdik. Amma hələ qarşılaşmalar davam edir və bizi daha iki oyun gözləyir. Qalib gəlməyə çalışıb, həm turnir cədvəlində, həm də dünya reytinqində irəliləmək istəyirik. Oyunlarımız Bakıdadı. Doğma meydanda azarkeşlərin dəstəyi ilə oynamaq daha rahat olacaq. Mən artıq 10 ildən çoxdu Faiq müəllimi tanıyıram və məşqlərdə iştirak edirəm. Fikrimcə, biz daha çox birlikdə məşq etsəydik, Faiq Qarayevin rəhbərliyi ilə daha yaxşı oyun sərgiləyə bilərdik. Bunu bir bəhanə kimi demək istəmirəm. Lakin həqiqətən də yarışa hazırlıq üçün vaxtımız çox az idi".

"Bildiyiniz kimi, komandamız səfərdə 4 oyun keçirdi. Xorvatiyaya qalib gəlsək də, təəssüf ki, qalan üç komandaya - Slovakiya, Rumınya və İsveçə məğlub olduq. Buna baxmayaraq, komandamızın əzimkar mübarizə apardığını deyə bilərəm. Hələ bizi Bakıda, doğma arenada Avstriya və Estoniyaya qarşı oyunlar gözləyir. Azarkeşləri tribunaları doldurmağa, bizə dəstək olmağa dəvət edirik. Düzdü, turnirdə şansımız az görünə bilər. Ancaq bir şeyi bilməliyik ki, ümid hər zaman sonda bitir. Biz də sona qədər mübarizə aparmağa hazırıq. Komandama inamım və güvənim sonsuzdu. Turnirlə vidalaşmaq fikrində də deyilik. Komandaya daha çox gənc oyunçu cəlb olunub. Bu da gənclərə verilən şans və güvəndi. Faiq Qarayevin gələcək milli komandamızı indidən formalaşdırdığını deyə bilərik. İnanıram ki, Faiq müəllimin rəhbərliyi ilə daha yaxşı nəticələr əldə edəcəyik".