“Turan Tovuz” son turda “Kəpəz”i məğlub etdi.

Matçdan sonra mövsümü 5-ci pillədə bitirən “bozqurd”un İdarə Heyətinin sədri Ehtiram Quliyev jurnalistlərin suallarını cavabladı. O, geridə qalan mövsümü dəyərləndirməklə yanaşı, növbəti “futbol ili” üçün planları açıqladı.

– Ehtiram bəy, mövsümü necə xarakterizə etmək olar?
– “Turan Tovuz” camiəsi üçün yaxşı təcrübə oldu. Çox maraqlı, gərgin idman mübarizəsi şəraitində keçən çempionat izlədik. Növbəti “futbol ili”ndə daha güclü və rəqabətli çempionatın olmasını arzulayıram. Gələn il bizi bundan daha maraqlı premyer-liqa gözləyir.

– Bu dəfə avrokuboklar uğrunda mübarizəni son turlara qədər davam etdirə bildiz. Növbəti mövsüm üçün planlar necədi?
– Düzdü, müəyyən çatışmazlıqlar fonunda avrokuboklara yollanmaq niyyətinə düşmək çətindi. Lakin ən azı vəsiqə qazanmalıyıq. Bəlli yola çıxmışıq. İnfrastrukturu qurub, inkişaf etdirə-etdirə artıq daha yüksək yerlər uğrunda mübarizə aparacağıq. Qısası, gələn il hədəf artıq avrokuboklar olacaq.

– İnfrastruktur demişkən, bu yöndə vəziyyət nə yerdədi?
– Hələ ki layihələndirmə işləri aparılır. Qanunvericiliyin tələblərinə uyğun olaraq stadion ərazisindəki işıq dirəkləri və akademiya binasıyla bağlı bütün prosedurları axır ki yerinə yetirə bildik. Başqa məsələlərin həlli üçün isə vaxt lazımdı. Ot örtüyünün dəyişdirilməsiyə bağlı AFFA-ya yenidən müraciət etmişik. Çünki bu, təkbaşına görə biləcəyimiz iş deyil. Qurumla danışıqlar gedir. Başa düşürük ki, hər şeyi AFFA-nın boynuna atmaq, onlardan nəsə gözləmək doğru deyil. Onlar da məhdud büdcəyə sahibdi. Amma bu yöndə xahişimizi qarşı tərəfə çatdırmışıq. Tək öz klumuzu düşünmürük. Artıq ölkə futbolu təbii ot örtüklü meydançalarda oynanılmalıdı.

– Daha yaxşı büdcəyə sahib olan klublar bu mövsüm avrokuboklara vəsiqə qazana bilmədi. Siz bunu bacara biləcəyinə nə dərəcədə inanırsız? Və belə tələb ciddi təzyiqə səbəb ola bilər...
– Bu futboldu, təzyiqlə böyüməli və o həyəcanı yaşamalısan. Komanda olaraq, belə sınaqlara hazır olmalıyıq. Həm rəhbərlik, həm komandalar, həm də azarkeşlər təzyiqə dözümlü olmalıdı. Bu mənada müəyyən təcrübə toplaya bilmişik. İstəyirik ki, təzyiq və stressin ölçüsü daha çox olsun. Belə hallar inkişafı sürətləndirən amillərdəndi. Əlbəttə, danışdıqlarım, sadəcə, istəkdi. Hər dediyimiz alınmır. Amma ən azı buna cəhd etməliyik.

– Belədə düşünmək olar ki, kluba ayrılan büdcə artırılacaq. Təxminən nə qədər məbləğ nəzərdə tutulub?
– Bəli, maliyyə baxımından dəyişiklik olacaq. Lakin elə də ciddi artımdan söhbət getmir. İnfrastruktura yatırım edib, komandaya etməsək və ya əksini etsək, premyer-liqanı tərk edə bilərik. Nəticədə başqa məsələlər əhəmiyyətsiz olur. Əksi də bir işə yaramaz. Odu ki, planları paralel şəkildə həyata keçirməliyik. Bunun üçün bizə 3-5 il vaxt lazımdı.

– Ehtiram bəy, AFFA-nın İcraiyyə Komitəsinin iclasından sonra Qurban Qurbanov 1-ci liqa klublarının infrastrukturunu yaxşılaşdırmaq üçün maliyyə ayrılacağını dedi. Lakin premyer-liqa klubları bu yöndə iş görmək üçün dəstək istəyəndə müsbət cavab verilmir. Sizcə, bunun səbəbi nədi?
– Maliyyə! 1-ci liqa klublarına da ciddi məbləğ ayrılmır. Halbuki ölkə futbolunun inkişafı üçün daha çox maliyyə lazımdı. Şəxsi vəsait deyil ki, hesablansın və həmin an pul verilsin. Reallıq fərqlidi. Yoxsa bu gün şiddətlə narazılıq edərəm ki, futbola diqqət yetirilmir. Axı inkişafı hamı istəyir... Bu üzdən biz də fikrimizi dəyişdik. Əvvəl ot örtüyünün dəyişdirilməsi üçün lazım olan vəsaitin yarısını AFFA-dan istəmişdik. Bu dəfə “nə verərsiz, verərsiz...” dedik. Artıq bu mərhələyə gəlmişik. Vaxtımız məhduddu. Yaxın günlərdə bu məsələylə bağlı qərar verilməlidi. Geciksək, növbəti mövsümdə yenidən süni ot örtüyündə oynamalı olacağıq.

– Mediada belə xəbər yayılmışdı ki, Klublar Komitəsinin sonuncu iclasında əvəzedicilər liqasının ləğvini təklif etmisiz. Bu xəbər nə dərəcədə doğrudu?
– Həmin iclasda hansısa təklifdən bəhs edilmədi. Sadəcə, hər kəs öz fikrini dedi. Şəxsən mən belə düşünürəm ki, bu liqa ləğv olunsa, yaxşıdı. Çünki aşağı liqalarda futbolçu çatışmazlığı var. Biz oyunçularımızı çox sevirik - bu, öz yerində. Lakin onlar gedib 1-ci və 2-ci liqa klublarında “parlaya” bilər. Bundan sonra premyer-liqa klublarının diqqətini cəlb etmək daha asan olacaq. Hər kəs öz işini biləcək. Məncə, futbolçu aşağı liqada çıxış etməyə layiq deyilsə, “Turan Tovuz”un əvəzedici heyətində oynamağa da layiq deyil! Klublarda boşuna yer tutmaqdansa, daha faydalı işlərlə məşğul ola bilərlər. Bu, şəxsi fikrimdi. Təbii ki, razılaşmayanlar da var. Hətta bizim akademiyanın məşqçiləri və baş məşqçimiz bu fikri bölüşmür. Lakin yanaşmam budu. Həm vaxt, həm də maliyyə boşuna xərclənir. Futbolçu əvəzedici heyətdə oturub nə vaxt əsas heyətdə şans qazanacağını düşünür. Digər tərəfdən, legioner limiti artırılır. Bu o deməkdi ki, həmin oyunçuların işi daha da çətinləşəcək. Şansları azalır. Qısası, onları aldadırıq...

– Ayxan Abbasovun son iki mövsümdəki fəaliyyətini necə dəyərləndirirsiz?
– Baş məşqçimiz qarşısına qoyulan məqsədlərə çatdı. Təbii ki, hər insan səhv edir. Bizim də yanlışlarımız var. Ümumən müsbət qiymətləndirirəm. Yaxın günlərdə onunla birlikdə növbəti “futbol ili”nin planlarını müzakirə edib strategiyamızı müəyyənləşdirəcəyik. Hədəflərə uyğun tapşırıqlar olacaq.

KƏNAN BAHADIR