Cari mövsümdə üç Qərb derbisinə şahidlik etmişdik.

Bunların ikisində "Turan Tovuz", birində "Kəpəz" qələbəyə sevinmişdi. İndi meydan sahibləri üstünlüyünü möhkəmləndirmək, qonaqlar bərabərliyə nail olmaq istəyirdi. Həmçinin “Səbail” bir gün əvvəl uduzduğundan tovuzluların nəticədən asılı olmayaraq, 6-cı pilləni itirməyəcəyi atdın idi. “Kəpəz” isə 8-ci yerdə qalmaq üçün xala ehtiyac duyurdu. Heyətində ciddi itkilər olan gəncəlilərin bunu bacarması çətin məsələ idi. Tovuzlu azarkeşlərin təzyiqi də öz yerində.

Belə ab-havada start götürən oyunun ilk dəqiqələri "bozqurd"un üstünlüyü ilə müşayiət olundu. Hesabı açmağa tələsən meydan sahibləri bəxtini Hakmanla sınadı. Ehtiram topu sinəsiylə ram edərək təhlükəli zonadan uzaqlaşdırdı. O başqa məsələ ki, epizod qolla tamamlansa belə, qayda pozuntusu qeydə alınacaqdı. 17-ci dəqiqədə Nemət cərimə meydançası daixilində İsmayılın ayağını tapdaladığından matçda fasilə yarandı. Zədələnən futbolçuya tibbi müdaxilə anında ədalət təmsilçisi VAR-a baxmağa dəvət edildi. Əhmədov epizodu incələdikdən sonra penalti qərarı verməklə yanaşı, Nemətə "sarı" göstərdi. "Sarı-göylər"i cəzalandırmaq Paçuya həvalə edildi ki, İqor zərbənin istiqamətini düzgün təyin edərək tovuzlu azarkeşlərinin sevincini gözündə qoydu. Bundan sonra "bozqurd"da ruh düşkünlüyü hiss olunmağa başladı. "Sarı-göylər" bu ərəfədə hesabı açmaq üçün fürsət əldə edə bilərdi. Lakin hücum cəhdlərini reallaşdırmağa çalışan Camal ön xətdə tək qaldığından uğursuzluğa düçar olurdu. Xüsusilə Niane sanki ona kömək etmək niyyətində deyildi. Malili yorğun və ləng görünürdü. Belədə meydan sahiblərinin üstünlüyü şəraitində keçən ilk yarıda hesab açılmadı. "Kəpəz" isə bir neçə aparıcı oyunçunun yoxluğu və kasad ehtiyat oyunçular skamyası fonunda müdafiə olunmaqla kifayətləndi.

İkinci hissə Rodrigesin növbəti çətin sınağın öhdəsindən gəlməsiylə başladı. Portuqaliyalı Serranonun uzaqdan qüvvətli zərbəsini zərərsizləşdirdi. Bir qədər sonra Hakman hesabı açmağa yaxın oldu. Toqolu müdafiəçinin başla zərbəsi tirə dəydi. “Kəpəz”in yorğunluğu fonunda daha üstün çıxış edən “bozqurd” daha bir neçə təhlükəli vəziyyətlə yadda qaldı. Birincidə Ayxan istəyinə çatmadısa, sonradan Otto komandasını sevindirdi. Nigeriyalı Aleksin cərimə meydançası daxilinə ötürməsini başla qapıya yönəltdi ki, İqor zərbə qarşısında aciz oldu. Belədə “sarı-göylər”in hesabı bərabərləşdirmək üçün daha istəkli çıxış edəcəyini düşünmək olardı. Lakin sona qədər cəmi bir qol vəziyyəti yarada bildilər. Cavadın həmin fürsəti dəyərləndirə bilməməsini ədalət təmsilçisinin final fiti müşayiət etdi. Nəticədə “Turan Tovuz” cari mövsümdə üçüncü dəfə derbinin qalibi oldu. “Kəpəz” isə bu məğlubiyyətlə “Araz-Naxçıvan” – “Qarabağ” matçından sonra (2:2) 9-cu pilləyə enəcəyindən xəbərsiz idi...

KƏNAN BAHADIR