Millimizin müdafiəçisi Bəxtiyar Həsənalızadə karyerasına Türkiyədə davam edir.

Bəs işlər istədiyi kimi gedirmi? Yox. Mövsümün əvvəlində 1-ci liqa iştirakçısı “Tuzlaspor”la anlaşan futbolçu bəxtsizliklə üzləşdi. Daha dəqiqi, onun şərəfini qoruduğu komanda 18 iştirakçının olduğu çempionatda 16-cı pillədə qərarlaşdığından aşağı liqaya yuvarlandı. Qısası, Tuzla təmsilçisinin növbəti mövsümdə 2-ci liqada çıxış edəcəyi bəllidi. Düzdü, Bəxtiyarın klubla müqaviləsinin müddəti 2025-ci ilin yayında başa çatır. Lakin son nəticənun planları dəyişmək ehtimalı böyükdü. Bir tərəfdən bunun səbəbləri maraqlıdısa, digər tərəfdən futbolçunun komandadan ayrılmaq ehtimalı artıb.
Əlbəttə, Həsənalızadənin legioner həyatının ilk səhifələrinin cızmaqara olması xoşagələn hal deyil. Belədə nələrin baş verdiyini, ümumi təəssüratlarını və karyerasının növbəti mərhələsi haqda oyunçunun özündən məlumat öyrənmək zəruridi. Biz də məhz bu məqsədlə Türkiyədəki həmvətənimizlə əlaqə saxlayıb, qeyd olunanlar və başqa məsələlər ətrafında söhbətləşdik.

– Bəxtiyar, əvvəlcə “Tuzlaspor”un ümumi durumundan danışaq. Mövsümün əvvəlində hədəf nə idi və buna çatmağa nə mane oldu?
– Düzü, mövsüm başlayanda qarşımıza konkret hədəf qoyulmamışdı. Hadisələrin axarına uyğun qərar veriləcəkdi. Sonradan 1-ci liqada qalmaq uğrunda mübarizə aparsaq da, təəssüf ki, alınmadı.

– Bu uğursuzluqda sənin nə qədər rolun oldu? Özünü nə dərəcədə günahkar hiss edirsən? Ümumiyyətlə, çıxışını necə qiymətləndirirsən?
– Öz çıxışımla bağlı ətraflı danışmaq istəmirəm. Düşünürəm ki, pis alınmadı. Uğursuz saymazdım. Əsas odu ki, oyunlarda şans qazandım və komandamın şərəfini qoruya bilmək üçün əlimdən gələni etdim. Hər şeyə görə şükür edirəm.

– Deməli, legioner həyatında ilk addımları səndə xoş təəssürat oyadıb...
– Bəli, məncə, uğurlu alındı. Çünki hələ ilk mövsümüm idi. Uyğunlaşmaq zaman aldı. Bununla yanaşı, zədələndiyimə görə bir müddət meydana çıxa bilmədim. Təbii ki, başqa problemlər də var idi. Çatışmazlıqlara baxmayaraq, 20 oyunda şans qazana bildim. Başverənlər haqda ancaq “xeyirlisi belə imiş” deyə bilərəm.

– Başqa prolemlər deyəndə, yəqin ki, maaşın gecikməsini nəzərdə tutursan. Bu məsələ haqda hələ bir neçə ay əvvəl Türkiyə mətbuatında xəbər yayılmışdı.
– Düzdü, bu mövzu hələ də aktualdı. Lakin ciddi problem deyil. Ödənişlər gec də olsa, edilirdi. Məsələn, indi də “Tuzlaspor”un mənə borcu var. Lakin bu, kluba problem yaradacaq qədər böyük məbləğ deyil. Ödəyəcəklərinə inanıram.

– Bəs bundan sonrakı planların necədi? Məndə olan məlumata görə, komandadan ayrılmaq niyyətindəsən. Daha dəqiqi, aşağı liqada çıxış etmək fikrin yoxdu. Təkliflər varmı? Ən əsası, vətənə dönməyi planlaşdırırsanmı?
– Bundan sonra nələrin baş verəcəyi tam dəqiq bilinmir. Hələ ki istirahət edirəm. Qarşıdakı günlərdə düşünməyə vaxtım olacaq. Sağlıq olsa, təkliflrə uyğun qərar verəcəm. Həm Türkiyədən, həm öz ölkəmizdən, həm də başqa yerlərdən təklif almışam. Son sözümü qarşı tərəfin tələblərinə əsasən deyəcəm. İnşallah, bir müddət sonra bu yöndə addım atacam.

– Bilindiyi kimi, Türkiyədə çıxış edən başqa legionerlərimiz də var. Onlarla görüşmək, müzakirə aparmaq şansın olub?
– Coşqun Diniyev və Vüsal İsgəndərliylə səmimi münasibətim var. Amma tez-tez görüşə bilməmişik. Daha çox millimizin oyunlarıyla bağlı bir araya gələndə söhbətləşə bilirik. Əsasən çempionatlar haqda danışırıq.

– Çempionat demişkən, Misli premyer-liqasında mövsüm başa çatır. Burda keçirilən oyunları izləyirsənmi? Elitamız Türkiyədən necə görünür?
– Bəli, imkan olduqca matçları izləyirəm. Düşünürəm ki, maraqlı keçir. Rəqabət artıb. Çempionluğu çıxmaq şərtiylə ilk “dördlük” uğrunda gərgin mübarizə var. Hər halda, azarkeşlər və ya kənardan izləyən insanlar üçün qaneedicidi.

– Bəs Türkiyə və Azərbaycan futbolunu hansı meyarlara əsasən müqayisə edə bilrəsən?
– Bizdə komandaların taktiki mübarizə üsulu daha keyfiyyətlidi. Türkiyədə isə əsasən fərdi üstünlüklər vacib sayılır. Burda fiziki güc vacib əhəmiyyət daşıyır.

Xatırladaq ki, Bəxtiyar karyerası ərzində “Sumqayıt”, “Zirə” və “Sabah” kimi komandalarda çıxış edib. O, 2022-ci ilin noyabrından əsas millimizin üzvüdü. 2014-cü ildən isə U-19 yığmamızın şərəfini qoruyub. Müdafiəçi 2023/24 mövsümündə “Tuzlaspor”un heyətində 20 dəfə meydana çıxıb, 1 qol, 1 məhsuldar ötürmə ilə yadda qalıb.

KƏNAN BAHADIR