“Səbail” mövsümün başa çatmasına bir tur qalmış ciddi çətinliklə üzləşib.

“Football-plus.az”ın əldə etdiyi məlumata görə, “dənizçilər”in bombardiri Aleksandr Ramalinqom komandadan ayrılmaq niyyətindədi. Onu bu qərara sövq edən məsələ isə “Qarabağ”dan aldığı cazibədar təklifdi.

Madaqaskarlı mərkəz hücumçusu Ağdam təmsilçisinin heyətində avrokubok matçlarında özünü göstərmək istəyir. Bayıl təmsilçisinin nəinki ilk “dörldük”dən, “altılıq”dan belə kənarda qalması isə təcrübəli legioneri narahat edən məqamlardandı.

Bununla yanaşı, o, gələn ayın sonunda müddəti başa çatacaq müqavilənin uzadılması üçün “dənizçilər”dən maaşının artırılmasını tələb edir. Maraqlıdı ki, klubdan futbolçuya istəyinin qarşılanmasının mümkün olmadığı bildirilib. Səbəb kimi Ramalinqoma “Səbail”in növbəti mövsüm üçün nəzərdə tutulan büdcəsinin indikindən daha az olacağı deyilib.

Qeyd edək ki, mərkəz hücumçusu cari mövsümdə Bayıl təmsilçisinin heyətində 37 matçda meydana çıxıb. Onun hesabında 17 qol, 1 məhsuldar ötürmə var.

KƏNAN BAHADIR