“Düzünü desəm, dünənki oyun bərbad oldu. Komandanı toparlaya bilmədik. Çünki hər kəsi çempionluğa kökləmişdik, amma əlimizdən getdi. Matçda da, göründüyü kimi, hamı olduqca motivasiyasız idi. Oyunöncəsi hazırlıq vaxtı məşqçilər əllərindən gələni etsələr belə, bunun xeyri olmadı. Psixoloji səddi aşa bilmədilər. Sırf məğlubiyyətin səbəbi gözlənilməz eniş oldu. Çempionatın sonuna yaxın hər kəsdə fiziki yorğunluq, həm də müəyyən gərginlik var. Eləcə də bizə çempionluq əldən gedəndən sonra İcraiyyə Komitəsinin komanda sayını artırmaması da birbaşa təsir göstərdi. Düşünürdük ki, çempion olmasaq belə, premyer-liqaya çıxacaq üç namizəddən biri biz olarıq. İlk “üçlük”də yerimizi möhkəmləndirmək üçün də oyunlara canfəşanlıqla, böyük motivasiya ilə çıxırdıq. Təəsüf ki, hadisələr fərqli cərəyan etdi. Elitaya yalnız liqanın çempionu yüksələcək. Belədə 3-cü, 4-cü və ya 7-ci yerdə olmaq əhəmiyyətini itirir. Bu üzdən növbəti çempionata köklənmişik. İstəyirik normal komanda qurub, daha yaxşı nəticələr üçün oynayaq. Bilirik ki, sonuncu turda da işimiz asan deyil. Əlbəttə, MOİK-lə görüşdən əvvəl futbolçuları toparlamağa çalışacağıq, amma çətin olacaq. Çünki hər kəs hədəfindən uzaq düşüb. Bu vəziyyətdən komandanı toparlamaq bir qədər zaman aparacaq. Psixoloji sarsıntı qalır. Verilən qərarla razılaşmaqdan başqa çıxış yolumuz yoxdu. Təki xeyirlisi olsun. Qısası, uduzmağımızın yeganə səbəbi sadaladığım amillər idi. "Araz Saatlı"nı da təbrik edirəm ki, əzmkar qələbə qazandılar. Həmişə belə olub - autsayder liderlə daha ciddi mübarizə aparır. Futbolçularımız əllərinə düşən fürsətləri qola çevirə bilmədilər. Penalti epizodu oldu, o da alınmadı. "Araz Saatlı" bu oyunda bizdən daha istəkli idi”.

“Düşünmürəm ki, "İmişli" çempionluq şansını itirdiyi üçün belə oldu. Həmçinin İcraiyyə Komitəsin qərarının onlara mənfi təsir göstərdiyi də zənn etmirəm. Bunlar start fitinə qədər düşünülə bilərdi. Amma meydanda tam başqa əhval-ruhiyyə vardı. Bilindiyi kimi, Saatlı və İmişli qonşu rayonlardı. Belədə azarkeşlər stadionda derbi ab-havası yaratdı. Oyunun gedişində də hər iki komanda aqressiv, gərgin, derbiyə layiq bir oyun nümayiş etdirdi. Bu matça çox yaxşı hazırlaşmışdıq. Futbolçular komanda şəklində oynayıb, "İmişli"nin istədiyi futbolu sərgiləməsinə mane oldular. İstənilən halda həm azarkeşlər üçün, həm Azərbaycan futbolu adına baxımlı oyun keçdi. Nə gözəl ki, biz qalib gəldik. Yəni futbolçuların əziyyəti yerdə qalmadı. 1-ci liqada qalmaq şansımıza gəlincə, hələ gözləmədəyik. İndi ruhdan düşmək, ümidini itirmək üçün hələ tezdi. 10 gün sonra, yəni mayın 27-də lisenziyalarla bağlı yekun qərar veriləcək. İclasdan sonra dəqiq informasiya olar. Ona qədər ümidimizi itirmirik”.