Bu gün 1-ci liqada çempionluğun taleyini həll edən görüşdə “Şamaxı” üstün oldu.

“Football-plus.az” xəbər verir ki, “şirlər” səfərdə “Qaradağ Lökbatan”ı 3:2 məğlub edərək sona 1 tur qalmış liderliyə yüksəldi. Artıq bölgə təmsilçisi premyer-liqanın bir addımlığındadı. “Şamaxı”nın baş məşqçisi Ramiz Məmmədov qarşılaşmadan sonra oyun barədə fikirlərini bölüşərək, jurnalistlərin suallarını cavabladı:

- Göründü ki, “Şamaxı” futbol oynamağı bacarır. Amma 55-ci dəqiqədən sonra komandanı müdafiəyə oturtdunuz. Bunun səbəbi nə idi?
- ⁠Bizə qəhrəmanlıq, çempionluq lazımdı. Dəfələrlə ən gözəl oyunlar oynamışıq, amma nəticədə istədiyimizi ala bilməmişik. Bu tarixdi. Matçın yaxşı və ya pis oynanılmağı tarixdə qalmır. Yalnız oyunun nəticəsi qalır.

- ⁠Fasilədə nə etdiniz? Yəni nəyi dəyişdiniz?
- ⁠Komandanın ruhu bura qələbə üçün gəlmişdi. Əvvəl də bunu demişəm. Hətta 5-6 həftə öncə komandama inandığımı bildirmişdim. Futbolçularım isə bu gün bir daha xarakterlərini ortaya qoydu. Belə deyək, bu vaxta qədər biz sadəcə arxayınlıqdan xallar itirmişik.

- ⁠Azər Həşimovla əvvəllər də “Mingəçevir”də bir yerdə çalışmısız. Xüsusi bir prinsipialınız var idimi ki, tələbənizin sizə qarşı olması?
- ⁠Azər kiçik qardaşımdı, əzizimdi. Həmişə mərifətiylə, qanacağıyla, öz dəst-xəttiylə Azərbaycan futbolunda seçilən biri olub. Bu gün də böyük, kiçik qardaş amili oyunda qaldı. Ona da öz minnətdarlığımı bildirirəm.

- ⁠Son turdakı rəqibiniz “Araz Saatlı”yla evdə oynayacaqsınız. Oyun barədə nə düşünürsüz?
- ⁠Hələ çempion olmamışıq. Ancaq qələbə üçün çalışırıq. Bu görüş qızıl oyun idi. Amma çempionluq məhz Şamaxıda həll olacaq. Onlara da uğurlar arzulayıram.

- ⁠”Araz Saatlı” nə qədər autsayder görünsə də bu gün “İmişli”ni məğlub etdi. Yəni heç bir stimul olmasa belə.
- ⁠İndiyə qədər hansı komanda lider olub və ya turnir cədvəlində bizdən aşağıda qərarlaşıb, baxmamışıq. Əgər bizdən aşağıda yerləşən komanda da olubsa, biz liderlə oyuna hazırlaşmışıq. Hamıya hörmətlə yanaşırıq. Burda zəif komanda yoxdu.

- ⁠Bu görüşdə VAR oldu. PFL-dən “Araz Saatlı” ilə oyun üçün də VAR olmasını istəyəcəksiz? Çünki həlledici oyundu. Yəni buna görə müraciət edəcəksiniz?
- ⁠⁠Lazım gəldiyi halda əlbəttə. Etsələr də, sağ olsunlar, etməsələr də.

- ⁠Premyer-liqaya vəsiqə qazanmağınızla bağlı rəhbərliklə söhbətiniz olub?
- ⁠Nə vaxta rəhbərliklə söhbətimiz olacaq. Amma çempionat bitdikdən sonra. Hələ ki, çempion deyilik. Sadəcə müvəqqəti bir vaxt liderliyə yüksəlmişik. Allahın köməyi ilə “Araz Saatlı” üzərində qələbə qazana bilsək, ondan sonra rəhbərliklə danışacayıq.

KAMAL SƏFƏR